رد الفنان أحمد سعد على اتهامات تقليده لأغنية 'نور العين' في أغنيته الجديدة 'حبيبنا'.

وقال أحمد سعد خلال لقائه في برنامج 'الحكاية' من تقديم عمرو أديب إن اللحن تم تقديمه قبل 60 عاما وبعدها تم تقديمه مجددا وأنه تشابه طبيعي.

وأوضح أحمد سعد: 'الأغنية اتعملت من 60 سنة وبعدين اتعملت تاني من 30 سنة، و25 و40، الناس بتقول أنها شبه 'نور العين' لعمرو دياب.

وتابع أحمد سعد: 'عشان الناس تبقى عارفة حاجة نبقى مجانين لو متأثرناش بعمرو دياب، اللي مشرفنا، هو رقم 1 وفضل من ساعة ما حياتنا ابتدت وهو رقم 1، فإحنا لما نتأثر بيه يبقى إحنا فعلا بنفهم'.

على جانب آخر، رد أحمد سعد على الانتقادات التي وجهت له بسبب إطلالته في حفل Joy Awards وظهوره يرتدي حلق.

وقال أحمد سعد: 'الفكرة نفسها بتجيلي من الشكل أو الموديل بتاع الستايل اللي أنا عامله في الوقت دا، نرجع نشوف طب هو صح طب هو غلط، أنا لما شفت أن هو صح ولا غلط أنت هتبص للراجل على أنه بحلق أو مش بحلق أو بشعر ولا مش بشعر، دي كلها ملهاش علاقة بالرجولة دي ليها علاقة بالذكورة، والذكورة تختلف عن الرجولة بكتير'.

وتابع أحمد سعد: 'أنت بتبص على البني آدم وبتقيمه بلابس إيه وبيعمل إيه؟ أنا مش من الناس دي، ولكن أنا اعتذرت عن أني لبست الحلق، الناس لما شافته انتقدت كتير جدا وأنا طلعت اعتذرت والناس بتقول هو كل شوية يعمل حاجة ويطلع يعتذر، أه كل شوية هعمل حاجة وأطلع اعتذر، المشكلة أن ألاقي الناس كلها شايفين حاجة في اتجاه، الناس اللي أنت عايش في وسطهم شايفين حاجة وأنت لأ شايف حاجة تانية، الناس اللي بنتقد وبتوجهني أنا عايش وسطهم اللي يرفضوه أرفضه واللي يقبلوه أقبله أنا مش عايش لوحدي ولكن أنا بتجيلي هفوات زي أي واحد'.