خاص ناندا محمد: عجبني أن الناس مش مصدقة إني مش مصرية ومتوقعتش انتقادات نقابة التمريض لـ"بنج كلي" وجوزي السبب في اتقاني للهجة المصرية

بوجه بشوش وملامح هادئة تمكنت الفنانة ناندا محمد من خطف قلوب المشاهدين من اللحظة الأولى لظهورها في مسلسل 'بنج كلي' بشخصية 'ميس نادية'.

الممرضة في مستشفى 'الأمل' الوحيدة التي أعطت الأمل لدكتورة 'دعاء'، بطريقة تعاملها، أحبها الجمهور وتعاطف معها، وعندما اتهمت بسرقة الأدوية تعاطف المشاهدين معها وتمنوا أن تكون برئية.

تواصل FilFan.com مع ناندا محمد لتحدثنا عن سبب غيابها وكواليس التحضير لـ'ميس نادية'.

لمدة 4 سنوات غابت الفنانة ناندا محمد عن الأعمال التليفزيونية وسألناها عن سبب الغياب وقالت: 'أنا مببقاش عايزة أغيب خالص بس دايما ظروف الشغل مش بتسمح أن كل حاجة تظبط مع بعض، أنا الفترة اللي فاتت كان عندي عروض مسرح كتير برا مصر، لكن بعد 'بنج كلي' ناوية أركز مع التليفزيون لأنه كان واحشني وانبسط جدا بالشغل في المسلسل دا وإن شاء الله الأعمال اللي تجيلي تكون مناسبة'.

وسألنا ناندا محمد عن أكثر ما شجعاها لتقديم الشخصية ويكون العمل الذي تعود به منذ آخر أعمالها مسلسل 'بطلوع الروح' في رمضان 2022، وقالت: 'حبيت كل حاجة في 'ميس نادية' أنها شخص كريم وبيحب يساعد الناس كلها حتى لو عندها مشاكل كتير في حياتها ومضغوطة، مهنة التمريض من أصعب المهن في الدنيا حبيت إزاي أنها رغم ضغوطاتها بتحب تهون على نفسها وعلى الناس وتاخد الأمور ببساطة ودي كانت حاجة لطيفة إحنا محتاجين نتعلم من 'ميس نادية' الموضوع دا إننا نبتسم في وش الناس ونخلي الأمور تمشي، دي أكتر حاجة حبيتها وخلتني استمتع وأنا بحضر للشخصية'.

لـ'ميس نادية' ستايل خاص تظهر به من ربطة حجاب ومكياج وسألناها عن كواليس اختيار هذا اللوك وقالت: 'الشكل اللي ظهرت بيه دا أولا من أستاذة نادين وأستاذة إيناس عبد الله مصممة الملابس، قبل التصوير جربنا كذا شكل للحجاب، بس لقينا اللفة اللي حطاها أكتر حاجة لايقة عليها وعلى حركتها الكتير في الشغل، والمكياج اخترنا أن دا يكون الشكل لأنها بتهتم بنفسها هي مش بتحط حاجات 'أوفر' في ناس كتير كده في التمريض وغير التمريض بنات في كل الفئات سواء الشعبي أو مش شعبي بيكونوا لطاف وشكلهم حلو ومهتمين بنفسهم بشكل مش أوفر'.

وعن أكثر التعليقات التي تلقتها وأعجبتها قالت ناندا محمد: 'تعليقات كتير جدا أنا ممتنة حسيت بمحبة من الشعب المصري وشعوب تانية من برا مصر بعتولي، بس مصر تحديدا عشان المسلسل مصري كانت تعليقات كتير، ممتنة لكل حد كتبلي أو بعتلي رسالة أنا فرحانة جدا، أكتر حاجة عجبتني أن الناس كلها مش مصدقة إني مش مصرية ودي حاجة تشرفني مش بس تفرحني، أنا بحس نفسي مصرية بقالي كتير عايشة في مصر وجوزي مصري وخلاص بقيت مصرية وطبعا أنا سورية جدا، بس الموضوع دا أثر فيا جدا مكنتش متوقعة دا الموضوع دا تحديد أثر فيا بشكل كبير'.

وهنا كان لابد أن نعرف كيف اتقنت ناندا محمد اللهجة المصرية بهذا الشكل حتى أن الجمهور تفاجأ أنها سورية، وحكت لنا: 'أنا أول ما جيت مصر كان بعد ما اتجوزت جوزي عازف الكمان والمؤلف الموسيقى المصري محمد سامي، وابتديت شغل مسرح وأكتر حد فادني في الشغل على اللهجة المصرية كان جوزي، كان بيساعدني وأنا بحضر لأدواري لأنها بالمصري، أول عرض مسرحي اشتغلته في مصر كان 'العشاء الأخير' إخراج أحمد العطار وكان فيه سيد رجب ورمزي لينر ومحمد حاتم وطبعا ساعدوني، كنت لسه مش متقنة للهجة بس كان بيساعدني في طريقة النطق والإيقاع وكان عارف إني بحب اللهجة المصري وبحب مصر وكنت بشتغل من قلبي لأني كنت عايزة أوصل للحظة اللي الناس تبص عليا ومتعرفش أني مش مصرية كان دا هدفي، أنا اشتغلت كتير مسرح وهو أداني الفرصة إني اتكلم مصري كتير، أنا فاكرة سامي جوزي في مرة كنت في عرض والناس مكانتش عارفة إني مش مصرية وقالي 'إنتي لقطتي الروح المصرية' وأي حد بيحس إني مصرية دا شرف كبير أنا بحس المصريين أهلي ودا مش كلام اللي يعرفني عارف كده، أنا بحب سوريا وهي بلدي وهفضل سورية بس أنا كمان بقيت مصرية والاتنين في قلبي'.

مرت شخصية 'نادية' بضغوطات كثيرة بداية من قريبها البلطجي الذي يطالبها بسرقة الأدوية المخدرة، مرورا لاتهامها بالسرقة فعلا، وقالت عن أصعب المشاهد: 'في مشاهد كتير مكانتش سهلة بس أكتر مشهد لما 'دكتور فؤاد' أستاذ محسن محيي الدين اللي بحبه جدا ومحظوظة بالشغل معاه ومع كل فريق العمل، لما بيقول لميس 'نادية' أنها أخدت البراءة المشهد كله كان صعب وحلو في نفس الوقت كان صعب عشان أنا عايزاه يكون بسيط وحقيقي، والمشهد اللي بعديه لما بطلع أكلم 'رحيم' تصويره كان بعد شهرين وشوية فكان صعوبته أن أفضل في نفس الحالة'.

أغلب الأدوار التليفزيونية التي ظهرت فيها ناندا محمد كانت أدوار بعيدة كل البعد عن الدراما، لذا سألناها هل تحب تقديم أدوار كوميدية فيما هو قادم: 'أحب أقدم كل الأدوار أحب أقدم كوميدي ودراما، وأعتقد شخصية 'نادية' كان فيها حاجات مختلفة لحظات دراما ولحظات خفيفة، أتمنى أن الحاجات اللي تجيلي متحصرنيش في شكل واحد، أنا بحب أدخل في أدوار ومغامرات جديدة وأتمنى أن دا يحصل'.

تعرض مسلسل 'بنج كلي' لانتقادات خاصة من نقابة التمريض وعلقت على هذا الأمر وقالت: 'متوقعتش يكون في انتقادات من الممرضين لأن المسلسل مبيقدمش مهنة التمريض بطريقة سيئة بالعكس، بس أي حد في أي مهنة في الوحش وفي الكويس لو في حاجة مش عاجبة أشخاص معينين دا طبيعي لأن مفيش مهنة الناس كلها فيها كويسة، والتمريض والطب أكتر ناس بيشتغلوا وبيتعبوا فعمرنا ما هنحب أننا نهزق من المهن دي بس الناس لازم تعرف أنه عمل فني مش توثيق للواقع بنقدم شخصيات متنوعة ممكن تكون ضدها أو معاها المهم أن الجمهور يتفاعل معاها ويشوف نفسه فيها ويحب يتابع الحكاية، وبالنسبة ليا من حق أي حد يعترض أو يقول رأيه ومن حق أي حد يقدم أي شخصية في أي مهنة بأي شكل من الأشكال طالما هي جوا حكاية هنقدم فيها حاجة معينة'.

في النهاية أكدت ناندا محمد أنها لن تغيب مجددا بهذا الشكل، لذا سألناها من من النجوم تتمنى أن تعمل معهم: 'أحب اشتغل مع ناس كتير جدا مع كريم الشناوي وأحمد الجندي ونبيل أبو عوف ومعتز التوني، وكان ليا الحظ إني اشتغلت مع أستاذة كاملة أبو ذكري، وأحب اشتغل مع أحمد مالك وعصام عمر ومنى زكي وهند صبري ودينا الشربيني وصبا مبارك وكندة علوش ناس كتير جدا مش عايزة أنسى حد'.