يشارك الفيلم البريطاني 'In Camera' لأمير المصري في قسم عروض خاصة خارج المسابقة في الدورة 45 لمهرجان القاهرة السينمائي الدولي والذي تقام فعالياته في الفترة من يوم 13 وحتى 22 نوفمبر.

يثير فيلم In Camera تساؤلات حول الشخصية التي يجسدها أمير المصري والتي تربط بين الحقيقة والخيال، ويصفها الفنان بأن المخرج يقصد أن يترك مساحة للتفكير بين المشاهدين.

ويقول في تصريحات صحفية ل Filfan.com عن أسباب انجذابه للمشاركة في فيلم 'In Camera': 'كنت حابب أقدم شخصية 'كونراد' بجزء حلم وجزء حقيقي، جزء في خياله وجزء بيشتغل في الموضة وfashion وناجح'.

يضيف أنه استمتع بالتجربة رغم صعوبة تقديم شخصيتين في شخصية واحدة، يصف: 'المخرج كان قاصد يسيبك انت تقرر شايف إيه ما بين تجسيد الشخصية لصوت ضمير البطل أو الهوس لكن بالنسبة لي شوفت إن أنا جزء من شخصية البطل 'عدن'، بيعبر عن الجزء اللي مش عارف يوصله، أنا كنت بعمل الدور بطريقتين؛ أوقات بمثل كإني هو وأوقات بمثل كإني شخصيتي مصمم الأزياء 'كونراد' عادي'.

وعن أجواء التحضير وكواليس البروفات مع المخرج، يقول: 'شافني في فيلم 'ليمبو' فكلم مدير أعمالي ورشحني للدور، قدم لي معالجة درامية 200 صفحة، مفهمتش منها حاجة، حتى دوري كان الكلام مكتوب عنه قليل جدًا، واتفقنا نكتشف الشخصية مع بعض، أغلب صفحات المعالجة كانت صور منها لمحمد علي كلاي وقالي عايزك تبقى الشخص اللي لما يتواجد في المكان يملاه بجسمه، في الفيلم 'كونراد' بيظهر بشخصيات كلها زوايا واسعة wide مش قريبة close shot اللي استخدمها كتير مع شخصية البطل 'عدن' عشان تحس إنه كبير وبيفرض نفسه عليه'.

وعن مشاركاته المتكررة في المهرجانات الدولية والعالمية مع فيلم In Camera و Limbo وعدة أفلام أخرى سابقة، وعلاقتها بتفضيلاته للأفلام الفنية أكثر من التجارية، يوضح أمير المصري أنه دومًا ما يفضل التعرف إلى تجارب وعوالم جديدة من خلال السينما.

ويقول: 'تجذبني دايمًا القصة الحلوة سواء في الأفلام الفنية Artistic أو التجارية، المهم يكون في فكرة والناس تفهمها، ميضيعش ساعتين من حياته، مش مهم يعجبه لكن هيفكر مثلاً الدم الأزرق في أخر فيلم 'In Camera' كان يقصد يقتله ولا ليه مكنش دم أحمر وهكذا بتكون حاجات مختلفة مبتحصلش كتير في الأفلام'.

يتابع: 'فيلم Limbo بالنسبة لي كان تجاري ومستقل برضو واتباع كويس بره مصر، والفيلم اللي لسه مخلص تصويره 'Giant'، بلعب فيه دور ملاكم بريطاني اسمه نسيم حميد، رغم إنه فيلم تجاري جدًا لكن قصته تحس إن أي إنسان يتعاطف معاه، والفيلم فريق عمله ناس كتير كبيرة في هوليوود، لكن طريقة السينما بتفرق برضو، لو في مطاردات كتير وأكشن، إعرفي إن فيلم ده مش مهتم بالميزانسين أو Story Arc لكن أنا برضو بحب أفصل وأشوف نوعية السينما دي'.

وبسؤاله عن التعاون مع النجم الأمريكي الكبير سيلفستر ستالون، يقول: 'سيلفستر هو المنتج المنفذ لفيلم Giant، دي كانت خطوة مهمة جدًا للفيلم، هو اللي قدم فيلم Rocky، مبيدعمش أي فيلم ملاكمة غير لما يكون تبعه، إنه يدعم فيلم Giant ويبقى منتج منفذ من البداية فده معناه أنه شايف حاجة كويسة للفيلم، وهو شاف الفيلم قبلي والمخرج قالي إنه مبسوط بالقصة'.

كذلك يعبر عن سعادته بمشاركة فيلم In Camera في الدورة 45 لمهرجان القاهرة السينمائي الدولي بعد جولته بالمهرجانات العالمية، حيث كان العرض الأول له في مهرجان كارلوفي فاري السينمائي الدولي بدورته ال 57 ضمن مسابقة Proxima كما شارك الفيلم في مهرجان لندن السينمائي ضمن مسابقة Sutherland.

ويقول: ' من أفلامي المفضلة التي شاهدتها في مهرجان القاهرة السينمائي السنة دي؛ فيلم إيراني 'كعكتي المفضلة' حلو جدًا رغم ميزانية إنتاجه القليلة وأبطاله فوق السبعين سنة يعطوني أمل في الحياة، وفي مجموعة متميزة من الأفلام القصيرة المصرية، بحب قسم الأفلام القصيرة في مهرجان القاهرة لأنه بوابة اكتشاف مخرجين موهوبين وعوالم جديدة'.

تدور أحداث فيلم In Camera حول 'عدن/ممثل' شاب يمر بسلسلة من تجارب التمثيل الفاشلة، باحثًا عن فرصة لتحقيق حلمه، لكنه يواجه رفضًا مستمرًا، مما يدفعه لخوض رحلة لاكتشاف دوره الجديد في الحياة. الفيلم من تأليف وإخراج نقاش خالد في أولى تجاربه الإخراجية، ويشارك في بطولته إلى جانب أمير المصري كل من نبهان رضوان، روري فليك بيرن.

وعلى صعيد آخر، ينشغل الفنان أمير المصري الآن بتصوير الفيلم العالمي 100 Nights، وينتظر عرض فيلم Giant عن الملاكم نسيم حميد، كما انتهى من تصوير فيلم صيف ٦٧ مع المخرج أبو بكر شوقي.