تحدث الفنان عمرو دياب عن التطور الكبير الذي تشهده الساحة الموسيقية مؤكدا أنه يحاول دائما أن يكون متابع لكل جديد وما يهم الجمهور.

وقال عمرو دياب في لقاء مع Billboard Arabia: 'كل 6 شهور بيبقى في تغيير موسيقي وتغيير لذوق المستمع والمشاهد كنا بنقول كل سنة أو اتنين بقيت يمكن كل 3 شهور، ده بقى بيديني مسئولية إني إزاي أطور من نفسي لحد ما أوصل لأقرب حاجة وأقرب جمهور مش مهم سنة المهم يتقبلني وابقى فاهم هو بيعمل إيه'.

وتابع عمرو دياب: 'أنا شايف أن المزيكا بتطور كل شوية ولازم إحنا نتابعها لأن زمان مكانش في وسيلة تواصل زي دلوقتي وسائل التواصل بقيت سهلة أوي عند الجمهور، زمان الجمهور كان بيبقى مبسوط باللي إحنا بنقدمه بس نتيجة أن مكانش سامع أكتر من كده لكن دلوقتي لأ الموضوع اختلف بقى مسئولية'.

وعن التطور الموسيقي قال: 'معرفش التطور اللي هيجي هيبقى شكله إيه في AI دلوقتي وفي AGI وهيصة ومعرفش هنقدر نعمل فيها إيه، كنا بننافس التطور الموسيقي الأيام دي هننافس التكنولوجيا فهتبقى صعبة شوية'.

على جانب آخر، أحيا عمرو دياب حفلا غنائيا داخل مول مصر بمدينة السادس من أكتوبر، وسط حضور جماهيري واسع وتفاعل لافت من محبيه.

واستقبل الجمهور الهضبة بحفاوة كبيرة فور ظهوره على المسرح، حيث بدأ السهرة بأغنية 'يا أنا يا لأ'، قبل أن يقدم مجموعة متنوعة من أعماله الحديثة والقديمة، من بينها 'خطفوني'، و'الحظ'، و'وياه'، و'بابا'، و'لولا البنات'.

كما تضمن برنامج الحفل عددًا من الأغنيات التي قدمها عمرو دياب ضمن حملات إعلانية خلال شهر رمضان، إلى جانب مجموعة من أشهر أعماله التي شكلت جزءًا من ذاكرة جمهوره، ومنها 'قمرين'، و'العالم الله'، و'ليلي نهاري'، و'كل الكلام'، و'أعمل إيه'.