طمأن الفنان سامح الصريطي جمهوره عليه في أول ظهور له بعد تعرضه لوعكة صحية وإصابته بجلطة في المخ.

وفي مداخلة هاتفية ببرنامج 'البصمة' مع محمد الغيطي، حكى سامح الصريطي ما حدث معه قائلا: 'اللي حصل كنت عادي جدا وداخل مع أصدقائي مكان نتغدى وبعدين لقيت الدنيا مزغللة وابتدت الحروف تتلخبط مع بعضها، صديقي أدرك على طول وهو اللي اتصرف وأخدني على المستشفى، أنا كنت فقدت الوعي، رحت المستشفى ولحقوني، هما قعدوا يبحثوا عن جلطات ولقوا جلطات قديمة، بس ممكن يكون ضيق في شريان المخ عمل الحكاية دي'.

وتابع سامح الصريطي موضحا أن الأمر مر بسام وعاد إلى طبيعته قائلا: 'كرم ربنا اللي الواحد شافه أنه يعود كما كان، عادة الجلطة بتترك أثر لكن أنا شفت كرم ربنا رجعت كما كنت بكفاءة ومهارة الأطباء وبترتيب ربنا أن صديقي كان معايا وقدر يتصرف، أنا مش عارف إيه اللي حصل بس في الآخر ربنا قالي أنا كريم معاك'.

ووجه سامح الصريطي الشكر لكل جمهوره على دعائهم له قائلا: 'أثناء الفترة اللي موجود فيها في المستشفى مكنتش حاسس بحاجة بس كانوا بيبلغوني إني تريند ومكنتش فاهم لكن لما خرجت اللي أثلج صدر الواحد أنه لقى كل الدعاء دا، قلت ربنا أكرمني بسبب دعاء الناس دي، أنا كل ما استرجع كل اللي حصل أقول إزاي عديت منها وأقعد أشكر ربنا، وبتوجه بالشكر لكل المحبين والجماهير بقولهم بشكركم لأن دعائكم رد القضاء وأنقذ الواحد مع كرم ربنا ورعايته، وبقول لكل الناس شرب الماء بكثرة طول ما انت قاعد تشرب مايه وتمشي وتتحرك دول هينجونا من حاجات كتير'.

وأصيب سامح الصريطي بجلطة في المخ خلال الفترة الماضية.

وكان آخر أعمال سامح الصريطي مسلسل 'الحلانجي' وعرض في رمضان 2025.

مسلسل 'الحلانجي' من تأليف محمود حمدان، وإخراج معتز حسام، وبطولة محمد رجب، أيتن عامر ومحمد لطفي ومحمود قابيل وعبير صبري وإبراهيم السمان وأحمد وفيق وطارق صبري، ومجموعة من الفنانين.