كشف منسق الأزياء سعيد رمزي عن تفاصيل الملابس ورسم الشخصيات التي قدمها خلال مسلسل 'وننسى اللي كان' وكيف أثرت في الأحداث ورسمت تفاصيل الشخصيات.

وقال سعيد رمزي لـFilFan.com: 'بعدما قرأت السينارية بدأت في رسم الشخصيات، وشخصية (نهلة العبد)، التي قدمتها شيرين رضا، اخترنا لها ستايل أزياء الأثرياء Old Money، فهي أصلها من أسرة ثرية محترمة، وكان عندها تطلعات وظروفها المادية كانت أفضل من (جليلة رسلان)، وأصلا شيرين رضا من الوشوش والأجسام اللي لو لبست T-Shirt وجينز هتبقى حلوة'.

وتابع سعيد رمزي: أما دارين حداد، لاريسا، تم إضافة شخصيتها في آخر وقت، عندما قرأت السيناريو كانت الشخصية لرجل، واكتشفت أنها سيدة قبل التصوير بأيام، ومكنتش راسم خطة ليها، وملامح وجهها حادة وحلوة وطويلة، وهي أصلا موديل عالمية وجسمها مضبوط، فرسمت شخصية زعيمة العصابة باكسسوارات كبيرة على ودنها وفساتين جلد وقفازات، بجد دارين حداد من أحلى الشخصيات اللي لبستها، ورد الفعل كان حلو وكانت جميلة من جوا وبرا.

وأضاف سعيد رمزي: أما إنحي كيوان، فهي أيقونة في عالم الموضة ومعروفة بإطلالاتها، وشغلي مع انجي للسنة الثانية على التوالي بعد 'ونقابل حبيب'، ودايما بتحضر قبل التصوير بوقت وبتبقى حابة تيقى عارفة قبل المسلسل هتلبس ايه وهتعمل ايه، ومنظمة ومرتبة ودايما محضرة نفسها ودؤوبة على شغلها ودايما بقول لها طول ما انتي معايا في الشغل انا مش قلقان ومابتخدش مني مجهود كبير.

وعن البطولة الرجالية في المسلسل لكريم فهمي، قال سعيد رمزي: 'شخصية كريم فهمي، بنشوفها في الشارع المصري وعايشة في وسطينا والنموذج اللي حبيت أقدمه مش زي كل الحارات اللي مافيهوش ذوق وأسلوب اللبس اللي مش حلو، حبيت أقدم الحارة شيك ومحترمة، وفي بيوت شعبية نضيفة ومهذبة والناس بتعرف تلبس والشارع المصري شكله اتغير وفي اللبس سواء الصيني او التركي، ومش لازم نوصل للناس إنه عشان شعبي أنه يبقى لبسه قميء، بالعكس بيعرفوا يلبسوا باقل الامكانيات، وفي فرق بين كلمة شعبي وبيئة، شعبي يعني فلوسه متواضعة ولكن لبسه وهيئته شكلها حلو، بيئة هي انعدام الذوق والنضافة واللغة وهنا بنروح لمستوى متدني أكتر، وليس كل ما هو شعبي قميئ'.

واستكمل سعيد رمزي: 'الجاكيت الجينز والبنطلون جبتهم من الوكالة لكريم فهمي عشان يبان إنه مستهلك، وكل اللي ضيفناه تي شيرت من تحت، واختيار ملابس الجينز لشخصية (بدر) كان لأن الخامة دي عايشة وممكن يبقى عايش جوا الحارة ولو اتطلب منه يروح مول هيبقى بنفس المظهر'.

واستطرد: ولظروف بدر المادية والاقتصادية، البدلة اللي كان لابسها في بداية المسلسل، كنا جايبنها أكبر من مقاسه وتحتها تي شيرت سودا والبنطلون واسع، ولابس شراب أبيض، لأنه كان عنده بدلة واحد،ة ودوره أنه بيصور وبيشتغل كومبارس أو ادوار صغيرة، والفرق بقى بين البدلة التانية عملناها عند ميزون جميل عشان يبقى شكله لايق على وضعه الجديد مع جليلة'.

وأضاف سعيد رمزي: ملابس بدر جوا الحارة كانت ترينجات عادية من التوجيد والنور وفي منهم من الوكالة، ومش عشان شعبي البس حاجة مبهدلة، الراجل دا خريج كلية ووالده عنده محل بتاعه وبيشتغل مع فنانين وعنده بيت نضيف وله أخت وممكن نعمل بطل شعبي يحبب الناس في الشعبيين لأن هم ناس'.