اخبار السودان
موقع كل يوم -الانتباهة أون لاين
نشر بتاريخ: ١٠ أب ٢٠٢٢
*الناس ديل لو طالبوا بنظارة من حقهم.
*ولو طالبوا بعمودية.
*برضو من حقهم.
*نعمدهم إلى نجد لهم أطيان.
*فكم عمدة تم تعميده وهو خالي أطيان في هذا البلد.
*وكم عمدة أدوهوا أطيان الناس.
*وكم أجنبي دخل البلد دي ساااااااي.
*بس ماساي .
*فوق رأي.
*وده الرأي النكس راية الوطن العزيز الذي كان في الفؤاد ترعاهو العناية.
*بس ماسلم وطني العزيز
دايرين عمودية ونظارة.
*في البلد دي أي شي بنعموا سااااي.
*بدون دراسة.
*بدون تخطيط .
*وبدون استراتيجية.
*بس خلق الله خلقهم وحايمين.
*نعمل الزلط السبت.
*الأحد نحفروا عشان نمد توصيلات الكهربا.
*بنشتغل سااااي.
*نبل الآبري.
*نبل الكركدي.
*نبل التبلدي.
*نبل الهلال.
*بل ساااااي.
*نسافر برة البلد.
*مسافرين لي شنو ماعارفين.
*نسافر ساااااي.
*شافعنا يمرق الشارع.
*مرقت لي شنو.
*يقول ليك مرقت ساااي.
*الشافع خليهو.
*الزول الكبير.
*بمرق سااااي.
*مارق لي شنو هو ذاتو ماعارف.
*مارق ساااااي .
*شغلنا كلو ساااي.
*كورتنا ذاتها ساي.
*الهلال جايب خمسطاشر محترف أجنبي .
*والمريخ جايب تمنية.
*غير اللافين في الممتاز والجايين ساي.
*المحترفين الأجانب ديل تجنوا على خانات الوطنيين.
*وكتروا.
*يعني لو عملوا ليهم حلة وسموها شلعوعها المحترفيناب.
*ماتسابعد لو طالبوا بعمودية ونظارة ورقم وطني.
*ويطالبوا بتضمينهم بالوثيقة الدستورية.
*وإشراكهم في صناعة الدستور.
*وتخصيص أربعين مقعداً في البرلمان وتلاتة مقاعد في السيادي.
*وممكن يعملوا الحرية والتغيير خمسة.
*والتسعات الطويلات يزيدن.
*لأنو المحترفين الأجانب ديل بجيدبوهم سماسرة .
*وطبعاً تسعة أطول من السماسرة مافي.
*المهم.
*تم إعلان القرعة.
*وفرح الأهلة بكى أم كي أم الزنزباري.
*ولكنهم مادروا فرحة كي أم كي بملاقاة الهلال.
*وفرح أهل المريخ بجيبوتي.
*استخفافاً بها.
*ونسوا أن الفريق الموريتاني كورتو الدقت في حديدتنا لو ما الحديدة كان إتشربت مديدتنا.
*نحن ندير الكرة بتخلف.
*ونستعد بتخلف.
*وفكرتنا عن الآخرين مستمدة من ماضيهم .
*ولانهتم بمعرفة كيف أصبح حاضرهم.
*اللهم أيد الاسلام وأنصر المسلمين في مشارق الأرض ومغاربها.
*هم المسلمين ديل مشاكلهم من مشارق الأرض لي مغاربها؟؟؟.
*ده كلام شنو ده؟؟؟؟؟.
*أيها الناس.
*إن تنصروا الله ينصركم.
*أها
*نجي لي شمارات والي الخرتوم.
*كان شفت يا والينا .
*ناس شلعوعها المحترفيناب قالوا دايرين عمودية بي طينا.
*شفت الفوضى شن جابت لينا يا والينا؟؟؟.
سلك كهربا
ننساك كيف والكلب قال تلقطوا بس تلقطوا لما يوم تلقطوا لينا قليلة .
وإلى لقاء.
سلك
