نجلاء بدر: طلبت الطلاق بعد تعرضي لضغوط نفسية رهيبة بعد فشلي في الإنجاب

كشفت الفنانة نجلاء بدر، أنها خاضت تجربتين قاسيتين في محاولة للإنجاب عبر عمليات تلقيح البويضات على مدار عامين، واصفة الأمر بأنه 'قاس جدا ومؤلم على المستويين النفسي والجسدي'.

وقالت نجلاء بدر، خلال استضافتها في برنامج Mirror الذي يقدمه الإعلامي خالد فرج: العمليات دي صعبة جدا، فيها تدخل في الهرمونات ومضاعفات خطيرة، ممكن تسبب سرطان أو طفل مشوه. الدكتور كان بيقولي: مش إنتي عايزة تخلفي؟ خدي ده، رغم إنه ممكن يضرني ويضر الجنين.

وأضافت أنها خضعت لهذه التجربة مرتين، إلا أن محاولاتها لم تكلل بالنجاح، مؤكدة: 'عملت ده مرتين وربنا مش عايز إني أخلف، ناس قالتلي سافروا الهند ودول كتير وخلفوا، بس ربنا مش مقدر إني أخلف'.

وأوضحت أن فترة العمليات تزامنت مع مرورها بحالة نفسية صعبة وصلت إلى حد توتر العلاقة مع زوجها آنذاك، قائلة: 'كنت عصبية جدا وأقرب للجنون بسبب الأدوية، وطلبت الطلاق. كنت في حالة مش طبيعية، ولكني وجدت دعما كبيرا من شقيقي الأكبر 'نادر'، ووقتها قال لي جملة غيرت نظرتي للأمور برمتها، وهي: 'مين اللي هيخليكي تخلفي؟ ربنا ولا الدكتور؟ حسيت إني اتصفعت بالقلم، وفهمت إن حتى لو حصل حمل فالولادة نفسها بإرادة ربنا مش الدكتور.'.

وكشفت نجلاء بدر أنها بعد إدراكها ذلك، قررت التوقف بشكل كامل عن العلاج، قائلة 'روحت رميت كل الأدوية وتراجعت، وأخويا قاللي: مش يمكن لو خلفتي يبقى ابتلاء مش نعمة؟'.

كما أكدت أنها تلقت عروضا من خارج مصر لشراء بويضات من بنوك مخصصة لذلك، مضيفة: 'اتعرض عليا إني أشتري بويضات جاهزة من بره، أروح أختار البويضة ويتاخد السائل المنوي بتاع جوزي. يبقى ابنه من واحدة مش متجوزها. حاولوا يقنعوني إن الزرع في الرحم هيخليني أحس بالأمومة، لكني رفضت رفضا قاطعا'.

واختتمت الفنانة حديثها بالتأكيد على احترامها لقدر الله وقناعته بأن الإنجاب رزق لا يأتي بالإلحاح أو الضغوط، قائلة:'في النهاية اقتنعت إن الإرادة مش إرادتنا ولا إرادة الطب.. هي إرادة ربنا'.

لو فاتك: فن ولا فنكوش - 16 سؤال كل واحد هيجاوب لوحده ... عرفت كام سؤال منهم؟