أحمد سعد: أغنية "سايرينا" غيرت حياتي.. ونجاحي حصل لما ربنا شاور عليا

كشف الفنان أحمد سعد عن رؤيته لأسباب نجاحه الفني خلال السنوات الأخيرة، مؤكدًا أن الفضل الأول يعود إلى توفيق الله تعالى، ثم إلى اجتهاده المستمر.

قال أحمد سعد خلال حلوله ضيفا على برنامج 'معكم منى الشاذلي'، مساء الخميس، المذاع عبر شاشة 'ON' مع الإعلامية منى الشاذلي: 'في ناس لما بتوصل بتحب تنسب كل الفضل لنفسها، لكن الحقيقة أن الفضل لله سبحانه وتعالى في التوفيق، لأن التوفيق متقدرش تصنعه'، مشيرًا إلى أن الإنسان يجتهد ويقدّم أقصى ما لديه، لكن توقيت النجاح يظل بيد الله وحده.

وأضاف: 'أنا بقالي 15 سنة بشتغل بنفس القوة والجودة، بس التوقيت بتاع النجاح مش بإيدي.. والحمد لله ربنا بفضله شاور عليا في الفترة دي'.

في سياق آخر، أوضح 'سعد' أن أغنية 'سايرينا'، شكّلت نقطة تحول مهمة في مسيرته الفنية، إذ خرج من خلالها من إطار الأداء التقليدي الذي اعتاد عليه إلى أسلوب جديد أكثر مرونة.

وأردف: 'الأغنية دي من أول الأغاني اللي حصل لي فيها التطور في حياتي، أنا طول عمري كنت بغني بشكل معين مرتبط بالطرب، لحد لما جتني أغنية 'سايرينا' من صديقي الملحن إيهاب عبد الواحد، وكلمات منة عدلي القيعي، حسيت إن في حاجة مختلفة'.

كما أشار 'سعد' إلى أنه أثناء تسجيل الأغنية دخل في نقاش مع الملحن: 'رحت أسجلها بطريقتي، بقالي سنين بغني بنفس الأسلوب وبنفس القوة، لكن إيهاب قالي لأ، لازم أقولك تغني إزاي، في البداية حسيت إن في شدّ بيننا، وهو قالي أعمل اللي أنت عايزه، لكن لما سمعت نفسي، في اللحظة دي اتغيرت حياتي والله العظيم.. بصيت للأغنية وقولت طب ما أنا هو أنا، ليه متسمعش صوت من براك يخليك تغني بشكل مختلف، فقلت له اسمح كل اللي غنيته ده وقولي أغني ازاي'.

وأكد أنه كان يبني طوال حياته شكلا غنائيا يحبه ويهتم به، لكن في تلك اللحظة خرج من منطقة التصلب الفكري والعند، مضيفا: 'كنت مضايق من إيهاب وقتها جدا، لأنه بيقولي أغني بطريقة بسيطة جدا، سر الأغنية مع اللي لحنها اللي لازم تفهم منه، ومن هنا سألته أغني ازاي، وهو ده اللي غنيته، ولأول مرة أسمع نفسي بشكل مختلف، وحبيت الموضوع، ولما نجحت حسيت أن ربنا بيشاور ليّ على حاجة معينة لازم أفهمها'.