خالد الصاوي: مخرج كبير قالي في بداياتي عمرك ما هتبقى نجم

حكى الفنان خالد الصاوي عن بداياته الفنية موضحا أنه بدأ من مسرح الجامعة وأحب التمثيل الجماعي لذا لا يجد أي مشكلة في تقديم البطولة الجماعية مثلما حدث في مسلسل'أولاد الراعي'.

وتذكر خالد الصاوي موقفا لا ينساه مع مخرج كبير قال له جملة دفعته لأن يصبح أكثر عندا ويحقق نجاحا، وقال خلال لقائه في برنامج 'الستات ما يعرفوش يكدبوا': 'مخرج كبير وبحبه ومحترم وناس كتير بتحبه مش هقول اسمه قالي في البدايات أنت يجي منك بس عمرك ما هتبقى نجم، كان عندي 30 سنة، الجملة دي خلتني عنيد، كنت متضايق من نفسي مثلا عشان معنديش عياط صادق أو ضحك صادق بشك في نفسي ساعات لكن مش لدرجة اللي هو قاله'.

وعن الأعمال التي ندم على تقديمها قال خالد الصاوي: 'أنا أخطائي كتير بس عمري ما شيلت حد تبعات أخطائي، لو ليا حق باخده وبدافع عن حقوق آخرين، أنا مش حاسس إني اتظلمت، كنت بهاجم مثلا النظام المسرحي لكن كنت بتشغل مسرح وباخد جوايز فمقدرش ألوم حد على أي خطأ أنا عملته، الأخطاء اللي عملتها في حياتي ودتني لمأزق في حياتي دفعتني إني أقبل أدوار لو كنت ماشي مظبوط مكنتش هضطر إني أعملها'.

وتابع خالد الصاوي: 'مش هقدر أقول عن الدور اللي ندمان عليه لأنها أدوار اشتركت فيها مع زملاء جابني منتج دفعلي فلوس ومخرج أمن بيا، مقدرش أجي النهاردة أقول حاجة لأني أنا بكامل إرادتي وكامل وعيي وافقت أعمل الدور، كل اللي متأكد منه إني معنديش حاجة مبتذلة استخبى منها عندي أدوار متوسطة وعندي أدوار مش حلوة وأظن أن مجموع الأدوار مرضي بالنسبالي'.

يذكر أن خالد الصاوي قدم في رمضان 2026 مسلسل 'أولاد الراعي'.

ومسلسل 'أولاد الراعي' بطولة خالد الصاوي، ماجد المصري، أمل بشوشة، أحمد عيد، نوران ماجد، إيهاب فهمي، ونرمين الفقي، إلى جانب شادي مقار، وتأليف ريمون مقار وإخراج محمود كامل، العمل من إنتاج شركة فنون مصر بالتعاون مع الشركة المتحدة للخدمات الإعلامية.