ابنة إيناس الدغيدي: انتقادات؟ متعودة عليها... مش بتهزني الحاجات دي

علقت ابنة المخرجة إيناس الدغيدي، حبيبة نبيل معوض، على صورتها التي انتشرت بصحبة ابنتها في عقد قران والدتها، كاشفة كيف استقبلت خبر زواجها.

قالت حبيبة نبيل معوض عن الانتقادات التي تعرضت لها والدتها بعد إعلان خبر زواجها: 'من زمان وأنا عارفة ومتعودة، خاصة إني بنت إيناس الدغيدي، فمش مهتمة بالانتقادات ولا بأي حاجة، مش بتهزني الحاجات دي'، حسب تصريحاتها في مداخلة هاتفية لبرنامج 'صورة' الذي تقدمه الإعلامية لميس الحديدي.

وعن الوقت الذي استغرقته لاقتناعها بزواج والدتها قالت: لو كنت أصغر في السن شوية كنت ممكن أبقى مضايقة، أي بنت ممكن تتضايق لما تلاقي أمها تتجوز وتحس بغيرة إن حد هياخدها منها، لكن أنا بشيل همها كتير، ودلوقتي مبسوطة إن في حد جنبها يكون ظهر وسند ليها، خاصة إني عندي شغل وحياة وأطفال وبنشغل عنها كتير.

وأبدت حبيبة إعجابها برجل الأعمال سوكارنو قائلة: لما شفت أنكل أحمد اطمنت عليها.

والتقط أطراف الحديث زوج إيناس الدغيدي قائلًا: 'ما كنتش قلقان من رد فعل حبيبة، لأن هدف أي ابن أو بنت إنهم يشوفوا باباهم ومامتهم سعداء، والهدف من ارتباطي بإيناس إني أسعدها وأضيف ليها في حياتها، وأنا متأكد إن حبيبة بتحب مامتها'.

وعن رد فعل أبنائه من زواجه علق قائلًا: البنات لسه مش مستوعبين، لأن البنات بتغير على أبوها، ولكن الابن اقتنع من أول لحظة وبارك وهنأ، وبنتي الكبيرة باركت لي، ودي خطوة جيدة'.

وتحدث إيناس الدغيدي عن رد فعل ابنتها عندها أخبرتها أنها ستتزوج، قائلة: 'في البداية اتخضت، مكنتش عارفة إن يوم زي ده هيجي خاصة إنها عارفة إن حياتي كلها هم أحفادي، واعتقدت إني بلغت سن معين. في البداية اتخضت، قالت لي تعرفيه كويس؟ إنتي هتروحي بلد وهتسبينا؟ ولما وصل مصر أول يوم قرر يشوف حبيبة، فلما قعدت معاه هي وجوزها أعجبت به وقالت راجل محترم ومؤدب، ومع الوقت اقتنعت أكتر ودعمتنا أكتر'.