هشام ماجد: حبيت التمثيل بسبب هشام سليم وعيطت عليه بعد وفاته

كشف الفنان هشام ماجد عن حبه الكبير للفنان هشام سليم وأنه السبب في حبه للتمثيل.

وقال هشام ماجد خلال لقائه في برنامج 'صاحبة السعادة' مع إسعاد يونس: 'هشام سليم هو أكتر شخص أنا حبيت التمثيل بسببه لما كنت بتفرج عليه وأنا صغير كان نفسي أمثل عشان أبقى زي هشام سليم في 'ليالي الحلمية' و'الراية البيضا' في الفترة دي كنت موهوم بيه، إزاي لذيذ كده وعنده طاقة ودمه خفيف وشكله حلو ولطيف هو من الأسباب اللي حببتني في التمثيل'.

وتابع هشام ماجد: 'قابلته قبل ما يتوفى بسنة وقعدت معاه وهو شخص بسيط بساطة مش عادية كان قاعد عادي في مطعم وقعدت معاه وبجد من الناس اللي لما اتوفت أنا عيطت عليه بالدموع لأن قعدت افتكر حاجاته وهو صغير فعيطت عليه جامد الله يرحمه'.

وخلال اللقاء كشف هشام ماجد كواليس تنفيذ فيلم 'برشامة' الذي حقق نجاحا كبيرا في السينمات خلال الفترة الماضية.

وقال هشام ماجد: 'فيلم 'برشامة' ليه قصة كبيرة كان سبب إني اتعرف على خالد دياب، موضوع فيلم 'برشامة' من سنة 2018، هو خالد بعتلي المعالجة بتاعة الفيلم وبتاعة مسلسل 'أشغال شقة'، الفيلم أخد قلبي لأن خالد وشيرين ومحمد بيعملوا المعالجة كبيرة يعني مثلا معالجة مسلسل 'أشغال شقة' كانت 80 صفحة وإحنا في مسلسلات ممكن كل اللي ناخده 80 ورقة وننزل نصور، المعالجة كان فيها تفاصيل كتير بتضحك ودراما ومشاعر وشخصيات مبنية صح، أنا قلتله عايز أعمل الفيلم دا لكن حصلت ظروف، كنت هعمله أنا وشيكو الأول وبعدين حصلت ظروف واتعطلنا وبعدين الفيلم راح لناس تانية وبعدها عملنا 'أشغال شقة' فرجعنا'.

فيلم 'برشامة' بطولة: هشام ماجد، ومصطفى غريب، وحاتم صلاح، وباسم سمرة، وفدوى عابد، وكمال أبو رية، وعارفة عبد الرسول، ووليد فواز، وفاتن سعيد، وميشيل ميلاد، ومحمد أبو داود، تأليف خالد دياب وشيرين دياب وأحمد الزغبي، وإخراج خالد دياب، وإنتاج 'سكاي ليميت' و'فيلم سكوير'.

نرشح لك: إيه رأيكم لو حولنا البروفيسور لمسلسل مصري. مين يعمل الأدوار؟