تامر حسني يوجه رسالة طويلة بعد تصدر "لينا معاد" الترند

وجّه الفنان المصري تامر حسني رسالة مطولة إلى جمهوره، بعد تصدر أغنية 'الذوق العالي' التي قدّمها إلى جانب 'الكينغ' محمد منير الترند، ودخول أغاني ألبوم 'لينا معاد' الترند أيضاً.

تامر حسني يفتح قلبه للجمهور

قال حسني، في تدوينة عبر حسابه على منصة 'إكس': هنتهز الفرصة الجميلة دي إن أغنية الذوق العالي مع حبيبي اللي بموت فيه الـ King محمد منير تريند عام رقم واحد، وفي تريند الموسيقى لسه أول يوم أهوه، والـ 13 أغنية بتوع ألبوم لينا معاد في التريند.

وفتح الفنان قلبه للجمهور وكشف من خلال التدوينة أنه قام بمجهود كبير كي يصل بما قدّمه من خلال الألبوم إلى الترند.

قراءة التعليقات واحترام الذكريات

أكد تامر حسني أنه كان يتابع تعليقات جمهوره الإيجابية والسلبية ويدرسها، فضلاً عن احترامه لذكرياتهم التي تكونت على صوته، لافتاً إلى أن ذلك دفعه لبذل مجهود نال منه في بعض الأحيان لدرجة التعب ودخول المستشفى مرات عدة.

وقال النجم المصري: عايز أقولكم حاجة، عشان كنت أوصل إن ألبومي يدخل التريند كله، وبعيداً عن التريند يعجبكم كده.. أنا مشيت مشوار كبير، أوله إني كنت بقرأ كل تعليقاتكم السلبية قبل الإيجابية، لأني عارف إنكم بتحبوني، وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته. وتاني حاجة، احترمت ذكرياتكم اللي على صوتي، وتعبت تعب مش طبيعي، ودخلت مستشفيات نص السنة ومش بحب أقول ولا أنزل أخبار من دي.

رسالة حب من القلب

عبّر تامر حسني عن حبه الكبير لجمهوره، معترفاً بأن بعض ألبوماته لم تكن على قدر التوقعات بالنسبة إليهم، وأوضح ذلك بقوله: يا جماعة أنا بحبكوا أوي، ومن يوم ظهوري وأنا واحد منكم. عارف إن في ألبومات مكانتش قد توقعاتكم، وإن في ألبومات علامات مش هتتنسي. هي دي الحياة، شوية كده وشوية كده. بس عارف مدى حبكم لألبوم عيش بشوقك، فكان جوايا تحدي واحد بس: إني أتحدى نفسي في عيش بشوقك وأتفوق عليه.

وأضاف: فضلت أذاكر السوق الغنائي وتغير أنماط الموسيقى اللي أنا بحترمها كلها، وبحترم كل الفنانين اللي نجحوا فيها. فضلت أطور من أدائي، وأذاكر جوا الاستوديو مع مهندسي صوت لمدة سنتين، وأجتهد مع الموزعين والملحنين والشعراء اللي بشتغل معاهم في تقديم أجدد شيء. ويمكن زعلوا مني كتير من كتر ما أنا عمال أغير وأعدل وأعيد من أول وجديد. بس دلوقتي فرحتي بالدنيا وهما بيشكروني قدامكم وعلى تليفوني من الإشادات اللي سمعناها منكم في حقهم.

رسالة شكر للجمهور وصنّاع الألبوم

اختتم تامر حسني رسالته بالشكر الذي وجهه للجمهور وصناع ألبومه 'لينا معاد'، وقال: اشتغلت الألبوم ده وأنا جوايا عناد رهيب إن الألبوم كله يعجبكم. أكيد هيكون في تفاوت في الإعجاب، بس المهم إنكم قدرتوا مجهودي والتنوع اللي قدمته في الأوديو والڤيديو. متشكر من قلبي لكل حد نصحني، وكل حد نقدني عشان بيحبني. أنا سمعت كلامكم وتعبت أوي، وانتوا أكيد شايفين، تعبت عشانكم، وعشان برضو أحاول أكون واجهة فنية موسيقية جميلة لمصر، بحكم إني بسافر كتير أغني قصاد العالم، واسمي مطرب مصري عربي. شكراً شركة TH انتجتوا ألبوم كامل محترم. شكراً صنّاع الألبوم عن ألبوم لينا معاد. وكل الشكر ليكم يا أغلى الناس. ربنا يفرحكم زي ما انتوا مفرحني دلوقتي بكلامكم الجميل.

ألبوم 'لينا معاد' لـ تامر حسني

كان النجم تامر حسني طرح ألبومه الغنائي الجديد 'لينا معاد' عبر قناته الرسمية على منصة 'يوتيوب' والمنصات الرقمية المختلفة يوم 15 يوليو/ تموز 2025، وتضمن أغنية 'الذوق العالي'، 'الأنوثة الطاغية'، 'يا حب'، 'حبك لو غلطة'، 'خلونا نشوفكم تاني'، 'لينا معاد'، 'هو ده بقى'، 'حبيبي تقلان'، 'يلا يا كداب'، 'واحشني يا ابن اللذينة'، 'الاحتياج وحش'، 'هيموت ويرجع'، 'مستني إيه'، 'حفلة تخرج من حياتي'، و'ملكة جمال الكون'.