محمد عدوية: بحب أنزل محتوى يعيش والسوشيال ميديا خدمتني

كشف النجم محمد عدوية عن مفاجأة لجمهوره الذين ينتظر ألبومه كاملا، كاشفا أن ما تم طرحه هو مجرد نصف الألبوم!

قال محمد عدوية: 'ألبومي الجديد جزء منه صدر بمناسبة موسم الصيف كـ side one من 5 أغاني، والخمسة التانين هيكونوا في الشتاء'، حسب تصريحاته في برنامج 'صولو'، تقديم نيفين محمود على 'ميجا إف إم'.

واستكمل محمد عدوية: معايا 5 أغاني مختارهم للشتاء، ولكن لسه معايا وقت أضيف وأزود، ولحد آخر وقت هقرر هنزل بإيه، والهدف إن الأغاني تضيف للرصيد الفني، بحب أنزل محتوى يعيش مع الناس، والحمد لله بقالنا 9 أيام على نزول الألبوم، وردود الأفعال حلوة جدا.

وعن اختفائه في الفترة السابقة عن الأضواء، قال محمد عدوية: 'شاركت كتير في أغاني التترات ومسلسلات رمضان، وكان ليا حفلاتي، ولكن ما كانش لسه في أغاني جديدة أنزلها، وكنت الفترة دي بذاكر شوية السوق فيه إيه، والسوشيال ميديا خدمتني في إعادة انتشار الأغاني القديمة بتاعتي'.

وأضاف محمد عدوية: عشان أطلع الألبوم الجديد ذاكرت كويس، وكنت بشوف السلبيات والإيجابيات، لأنه كل ما الواحد بينضج أكتر، كل ما بيفهم الدنيا فيها إيه، وبيختار ويقيم التطور اللي حاصل يقدر يخدمه إزاي أو يقدم له إيه، الألبوم الجديد تم طرحه مع الشركة الجديدة هيثم سعيد - محمد علام، والصراحة عاملين اللي عليهم، والموزع فهد عبقري كمان غير إنه شبهي في نفس المزيكا اللي بحبها، عامل توزيع أغنية 'شكك في محله'، كلمات أيمن بهجت قمر، وألحان محمد يحيى.

وعن إطلالته الجديدة التي خطفت الأنظار، قال محمد عدوية: 'مش بس الأغاني الجديدة مهمة، لكن كمان لازم يكون فيه لوك جديد'.