كيف تفاعل الإعلام مع أزمة رامي صبري وويجز … هجوم ورفض

جدل كبير أثير خلال اليومين الماضيين بعد التصريحات المتبادلة بين الفنان رامي صبري ومطرب الراب ويجز، بعدما قال الأول أنه لا يفهم كلمات أغنياته ليرد ويجز ويصف رامي صبري أنه متواجد في المركز الـ19 بين النجوم.

رد ويجز على رامي صبري أثار الجدل وحرصت عدد من المذيعات على التعليق على هذه الأزمة وكشفن عن رأيهن فيها.

هاجمت المذيعة إنجي علي ويجز وقالت خلال تقديمها برنامج 'مصر جديدة' عبر قناة ETC إن حديث رامي صبري عن ويجز في برنامج 'حبر سري' لم يحمل أي إساءة تستدعي رده، مضيفة: 'أزمة بدون أي لازمة، ده اللي أقدر أقوله على خلاف رامي صبري وويجز'.

وتابعت إنجي أنور: 'فيديو ويجز ملهوش أي تلاتين لازمة، والفيديو ده مش لصالحك، وإن نم على شيء فينم على إنك مغرور وتنك جدا، لأ هو كان ناجح ونجم من قبلك واحترم نجاح اللي سبقوك'.

واختتمت إنجي أنور قائلة: 'الحقيقة طريقة ويجز غير مقبولة، مش علشان نجحت شوية ولبست طقم فلانتينو بقيت فوق النقد ومحدش يقرب منك، ده عبد الحليم حافظ ومحمد الوهاب وفريد الأطرش انتقدوهم'.

أما مفيدة شيحة كان لها رأيا آخر كشفت عنه في برنامجها 'الستات' فيه تفهم أكبر لموقف ويجز وقالت: 'الخناقة الشهيرة اللي موجودة على مواقع التواصل الاجتماعي واللي أنا شايفة أنها مكنش المفروض تحصل ما بين رامي صبري وويجز، الغلط من مين مش هقدر أقول لأني بشوف أن رامي صبري ابتدى أنه انتقد فكرة الراب وجاب سيرة ويجز وهو بينتقد ودا من حقه أنه يرفض أو ميحبش الراب وأنه مش بيفهم كلام ويجز بس ممكن مكنش يتقال على التليفزيون وأنا مش بغلطك لكن دي وجهة نظري'.

وتابعت مفيدة شيحة: 'نيجي لوجهة النظر التانية، ويجز أنت مش محتاج أنك تطلع ترد على نجم زي رامي صبري أنتوا الاتنين كبار ومهمين في مجالكم أحنا مش محتاجين نرد على بعض أنا شفت الفيديو حسيت أنك عملت الفيديو وأنت منفعل لو كنت هديت قبل ما تعمله مكنتش صورته، أنتوا الاتنين نجوم كبار وبتقدموا فن أكثر من رائع كل واحد ليه جمهور، ومكنش ينفع شيرين زوجة رامي صبري أنها تدخل في النص'.

فيما قالت المذيعة سهير جودة خلال برنامج 'الستات': التصريحات المتبادلة بين اتنين مطربين وليهم جمهورهم، أنا شخصيا مش بفهم الأغاني غير بعد ما بقراها لكن وهي بتتغنى ممكن متستوعبش أو مش واخدين عليها، ووارد جدا أن ذوقي الشخصي مختلف عن اللي بتقدمه ودا مش معناه إني مش معترف بنجوميتك، المهم أن رامي صبري مغلطش في ويجز لكن ويجز طلع ولو كان فكر شوية مكنش هيرد بالشكل القاسي ده، دا مش أداء نجوم'.

أما المذيعة جيهان عبد الله انتقدت فكرة ترويج ويجز لأغنيته الجديدة من خلال مهاجمته لرامي صبري وقالت: 'هو كان بيتكلم عن مجال موسيقى مش على شخص بعينه وقال رأي ميزعلش في حاجة، كل واحد ليه رأيه أنا بحب اسمع حاجة وحاجات تانية مش بحبها مش معناه أن التاني مش حلو لكن ليه أمسكه هو كشخص وأقول اتهامات عشان أروج لأغنيتي وأديله مركز وأصنفه، الوضع مخزي جدا ومهزلة حاصلة والمختلف في الموضوع أن دا بقى الجديد عشان التريند إحنا رايحين فين المجال بقى مفتوح نهين في الناس ونهين في مكانة وقد وضع ليه في مجال الموسيقى عشان أقدم الموسيقى'.

وكان رامي صبري تحدث عن ويجز خلال لقائه في برنامج 'حبر سري' وقال: 'ويجز زعلان مني ومش عارف ليه أنا قلت إني مش بفهم كلامه ودي حقيقة بس قلت عليه إنه بيعمل مزيكا حلوة ومجتهد'.

ليرد ويجز قائلا: 'هتكلم على فنان فاكر أنه عنده صلاحية يطلع يتكلم في أي وقت على أي حد والناس تسمع وتسكت، الفنان دا اسمه رامي، رامي دا بقى كل لما يقعد 5 شهور يزهق يطلع يتكلم في التليفزيون على بتوع الراب والهيب هوب وكده، طيب أنت بتتكلم أمتى عن بتوت البوب اللي أنت منهم، على فنك ومجالك وكده'.

وتابع ويجز: 'أنا شايف أنك مبتفهمش في الراب دا حاجة ولا بتفهم الكلام بتاعه زي ما أنت قلت قبل كده فمش هتعرف تعمله أنا راجل مثلا لو لقيت واحد بيعرف يسوق عجلة وأنا مبعرفش بحترمه ليه عشان هو عمل حاجة غير اللي أنا عملتها اشتغل على نفسه في حاجة أنا مشتغلتش على نفسي فيها فأنت مبتقدرش الفنانين دول شايفهم بيحاولوا يوصلوا لليفل أنت فيه في حين أنهم معدينك أنت مش رقم 2 يا رامي أنت رقم 19 مثلا، أنت بعيد أوي'.