عبير صبري عن ريهام حجاج: صديقتي الصدوقة وإنسانة جميلة

تحدثت الفنانة عبير صبري عن الفنانة ريهام حجاج وعلاقة الصداقة القوية التي تربطهما.

وقالت عبير صبري خلال لقائها في برنامج 'كلاكيت' مع لينا الطهطاوي عبر إذاعة وقناة 'نجوم FM': 'ريهام حجاج صديقتي الصدوقة في الوسط الفني، أنا لأول مرة يكون عندي صديقة بمعنى كلمة صديق في الوسط الفني هي ريهام حجاج، لأنها إنسانة جميلة'.

وتابعت عبير صبري: 'الناس بتقولي عشان بتشتغلوا مع بعض وأنا الكلام ده بالنسبة ليا مش برد عليه لأنه مش المستوى اللي برد عليه، أنا ريهام زي مروة أختي بالنسبة ليا أنا بلجأ لريهام زي مروة، أقولها يا ريهام حصل كذا اتصرف إزاي وهي تقعد تتكلم معايا وتديني وقت طويل ودي حاجة مش سهلة أن حد يديكي وقت طويل ويفكر معاكي ويفكرلك'.

وأكملت عبير صبري كلامها عن ريهام حجاج ووصفتها قائلة: 'هي شخصية متزنة جدا ومثقفة وعقلانية وجدعة، هي شخصية تساوي وزنها دهب'.

وخلال اللقاء كشفت عبير صبري عن أمنيتها في تقديم السيرة الذاتية للفنانة الراحلة داليدا.

وقالت عبير صبري: 'بحلم أقدم شخصية داليدا، داليدا حلمي المرعب لدرجة إني بزعل لما ألاقي حد تاني بيقول عايز أعمل داليدا'.

وتابعت عبير صبري: 'داليدا بالنسبة ليا شخصية درامية عميقة وإنسانية ونسائية وتجسيد لمشاعر الحب عند المرأة والضعف والاكتئاب، وهي عندها إشكاليات مع الموت كل الناس اللي حبتهم ماتوا وعندها مشاكل مع الكبر مع العمر معرفتش تتصالح معاها، عندها مشاكل كتير في حاجات كتير أوي عميقة وإنسانية'.