محمد عبد الرحمن عن انتقادات مسلسل "بريستيج": لولا اختلاف الأذواق لبارت السلع

تحدث الفنان محمد عبد الرحمن على رد فعل الجمهور على مسلسله 'بريستيج' وانقسامه بين معجب به وغير معجب.

وقال محمد عبد الرحمن خلال لقاء في برنامج 'تفاعلكم': 'هي تجربة جديدة واستثنائية على كل الموجودين فيها مش بس المخرجين لأ دا كمان على مهندس الديكور والمخرج، فإذا إحنا ارتضينا إننا نخوض التجربة دي طبعا في مثل بيقول لولا اختلاف الأذواق لبارت السلع، المسلسل هيعجب ناس ومش هيعجب ناس، وهيعجب ناس 50% وناس 30% وناس مش هيعجبها خالص'.

وتابع محمد عبد الرحمن: 'دي حاجة كويسة بالنسبة ليا بحب اسمع النقد اللي يقولي أنا غلطان في إيه قبل ما اسمع الرأي اللي يقولي برافو عليك، بالعكس ميضايقنيش لو حد قالي إنت غلط لما عملت كذا أو ناقصها كذا، دي حاجة تعلمني وتخليني في التجارب بعد كده أفهم أكتر وثقة الناس فيا بتديني ثقة وبتخوفني وتخليني أركز في اللي جاي'.

واختتم محمد عبد الرحمن كلامه: 'الانقسام اللي حصل دا معناه أنه مسلسل كويس يعني معناه فيه جدل وأنه عمل حالة جديدة، في ناس ممكن تعجبها حلقات معينة، محدش هيرسى على رأي 100%'.

وتدور أحداث 'بريستيج' حول عاصفة قوية تضرب شوارع القاهرة، مما يجبر 14 شخصا من خلفيات اجتماعية مختلفة إلى اللجوء إلى مقهى في وسط البلد. بعد انقطاع الكهرباء وعودتها، يكتشف الجميع أن أحدهم قد قُتل، ومع تصاعد التوترات يدركون أن القاتل بينهم، وهو ما يجعل كل شخص في المقهى مشتبها به ومحققا في نفس الوقت. تتطور الأحداث في إطار من التشويق والكوميديا.

والمسلسل من بطولة محمد عبد الرحمن، مصطفى غريب، راندا عوض، دينا، سامي مغاوري، بسام رجب، آلاء سنان، أمينة البنا، معاذ نبيل، وعمر الشريف، إلى جانب مغني الراب زياد ظاظا و صانع المحتوى عبد العاطي بالإضافة إلى مجموعة من النجوم الذين سيظهرون كضيوف شرف في الحلقات.