خاص ياسر جلال لـ"في الفن": "جودر" فرصة لتعريف الجيل الجديد بـ "شهريار" وهذا سبب اعتذاري عنه في البداية

يشهد شهر رمضان 2024 عودة تقديم 'ألف ليلة وليلة' بعد سنوات طويلة لم يقدم فيها، فيطل الفنان ياسر جلال على جمهوره هذا العام في دورين، دور 'شهريار' بطل 'ألف ليلة وليلة' ودور 'جودر' بطل الحكاية التي يرصدها العمل.

تحدي للنجم ياسر جلال في تقديم شخصية 'شهريار' التي قدمت من قبل كثيرا، وتجربة جديدة له في تقديم عمل فانتازيا.

تواصل FilFan.com مع الفنان ياسر جلال ليحدثنا عن مسلسل 'جودر' ولماذا اعتذر عن عدم تقديمه في البداية ثم عاد ليقدمه.

في البداية كشف ياسر جلال سبب اعتذاره عن عدم تقديمه لمسلسل 'ألف ليلة وليلة' وقال: 'لما اعتذرت عن مسلسل 'ألف ليلة وليلة' أول مرة كان لتخوفي من العمل حسيت إنه مسئولية كبيرة وعمل كان صعب وكنت خايف يطلع مش على المستوى المطلوب ولكن بعد فترة طمني الأستاذ محمد السعدي وطمني الأستاذ تامر مرتضى ومعاهم الأستاذ إسلام خيري إن العمل مكفول ليه كل عوامل النجاح وهيتعمل على الوجه الأكمل كل دا شجعني إني أرجع وأعمل المسلسل'.

'جودر' شخصية جديدة للنجم ياسر جلال وكشف عن ما شجعه لقبول هذا الدور وقال: 'الموضوع كان حلو جدا الكتابة اللي كاتبها الأستاذ أنور عبد المغيث جميلة جدا حدوتة 'جودر بن عمر المصري'، هي حدوتة 'جودر' اللي موجودة في 'ألف ليلة وليلة' لكن أستاذ أنور أخدها وطور فيها وحذف حاجات وأضاف حاجات وطور خطوط درامية تانية وبقت ملحمة ودا كله شجعني إني أخوض التجربة'.

بالإضافة أن اللون دا من الأعمال الدرامية مش بيتعمل كتير وبقالنا فترة مش بنعملها والأجيال الجديدة متعرفش 'شهرزاد' مين وإيه حكاية 'شهريار' فالمسلسل فرصة أنه يعرف الأجيال الجديدة على 'ألف ليلة وليلة' وحواديتها.

ينتظر الجمهور بشغف كبير مسلسل 'جودر' خاصة بعد عرض البرومو الرسمي له وما ظهر فيه من إمكانيات مستخدمة، تحدث ياسر جلال عن الصعوبات التي واجهته في هذا العمل وقال: 'تصوير النوع دا من الأعمال صعب بتلبس لبس غريب عليك ومش مريح في معظم الأحيان بنصور في أماكن تصوير صعبة حتى لو بنصور في ديكور بتبقى الكراسي مش مريحة وفي دخان كتير بيترش في المكان عشان يعمل تأثير معين للصورة وبيبقى الواحد مش قادر يتنفس'.

وتابع: 'التصوير في أماكن وعرة وبعيدة عن العمران عشان تقدر أن يكون في مصداقية تواكب تاريخ اللي بيتم فيه الأحداث، كلها حاجات صعبة حتى المواد اللي بنستخدمها وألإكسسوارات، كل دا بيخلي التمثيل صعب، بالإضافة إن ممكن تلبس لبس تقيل في الصيف وحر وتلبس لبس خفيف جدا في عز الشتاء كلها صعوبات بتحاول تتغلب عليها لتقوم بدورك على الوجه الأكمل'.

في البداية عرف الجمهور أن اسم المسلسل هو 'ألف ليلة وليلة' ثم مع طرح البوستر الرسمي وجدوا أن اسمه 'جودر' سألنا ياسر جلال عن سبب الترويج له بالاسم الأساسي 'جودر' وقال: 'المسلسل اسمه 'جودر بن عمر المصري' وبين قوسين 'ألف ليلة وليلة' وأستاذ أنور عبد المغيث المؤلف قدمه بهذا الشكل، لأن 'ألف ليلة وليلة' معنى شامل لما يكون في حواديت كتير إحنا عندنا حدوتة واحدة طول الـ30 حلقة 'جودر' زي سندباد وعلاء الدين وعلي بابا هو حكاية طريفة جدا لما تشوف الناس المسلسل هتفهم'.

فوجئ الجمهور أن مسلسل 'جودر' 15 حلقة فقط وأوضح ياسر جلال أنه كان 30 لكن تم تقسيمه ليعرض هذا العام والعام المقبل قائلا: 'المسلسل 30 حلقة وصورنا جزء كبير منهم اللي جاهز للعرض هما 15 حلقة، عشان كان رأي الشركة المنتجة أن أعمال الجرافيكس والمؤثرات البصرية تطلع على مستوى كويس، الجزء الأول هيتعرض في رمضان ده والجزء الثاني في رمضان القادم 2025'.

'و'جودر' هو التعاون الثالث بين النجم ياسر جلال والنجمة نور وعن كواليس العمل معها قال: 'نور شخصية ملتزمة ومحترمة وإحنا أصدقاء هي نجمة كبيرة وكاريزما رهيبة ومريحة جدا في الشغل ببقى سعيد لما بلتقي بيها وهي أصلح واحدة للدور اللي بتقدمه'.

وأكد ياسر جلال أنه سعيد بالتنويع في أعماله ففي كل عام يقدم دور مختلف يناقش قضية مهمة وهذا العام يخوض تجربة الفانتازيا الجديدة عليه.

ومسلسل 'جودر' يتكون من 15 حلقة، وهو مستوحى من حكايات ألف ليلة وليلة، وحمل في السابق هذا الاسم مبدئيا، والعمل بطولة ياسر جلال، نور اللبنانية، ياسمين رئيس، أحمد فتحى، هنادى مهنا، وفاء عامر، عبد العزيز مخيون، علي صبحي، وليد فواز، ياسر الطوبجي، أحمد كشك، عايدة رياض، جيهان الشماشرجي، محمود البزاوى، مجدي فكري، وتأليف أنور عبد المغيث، وإخراج إسلام خيرى وإنتاج شركتى ميديا هب سعدى – جوهر، وأروما للمنتج تامر مرتضى.

طالع أيضا: ريم رؤوف: أحمد مختار خالي ... وأحمد كمال كان صديقه وكان بيقعدني على حجره ويلعب بيا مع عبلة كامل