أحمد سعد: لما أعمل حاجة غلط هطلع أقول أنا غلط ومش هكابر

تحدث الفنان أحمد سعد عن تكرار اعتذاره عن أفعال قام بها، مثلما حدث مؤخرا بعد ظهوره بلحية بشكل غريب ثم قام بالاعتذار.

وقال أحمد سعد في لقاء مع ET بالعربي: 'أنا لو درست دقيقتين أي حاجة بعملها مش هعملها أنا الفوضى الخلاقة في حاجات ببقى عايز أعملها عشان أنا عايز أعملها لو كنت راجعت نفسي أو سألت ناس أو سألت نفسي مرة تاني مكنتش عملتها يمكن بعد ما بعملها والناس مبتحبهاش بطلع اعتذر وأنا في النص ببقى عايز اعتذر وعايز أرجع الحاجة الوحيدة اللي عمري ما هخسرها إني لما أعمل حاجة غلط هطلع أقول أنا غلط ومش هكابر ومش هقول أنا صح وأنا غلط، مفيش بني آدم على وجه الأرض مبيغلطش'.

كما تحدث أحمد سعد خلال اللقاء عن مشاركة ابنته جودي الغناء معه في أغنية 'كدا كدا' وقال: 'جودي كلمتها مبتنزلش الأرض حكمت عليا لأن أنا مكنتش موافق مش عشان مش بحب الفن أو الفنانين أو عندي أي تحفظات كنت عايزها تبقى طبيعية وتبقى زي الناس اللي بتروح الشغل الصبح وترجع بعد الضهر، إحنا عايشين على طول دايما في منافسة هتشتغل هتنجح ولا مش هتنجح كل يوم عايش في حياة فيها ضغط الناس بتبقى شايفه الجانب اللذيذ والحلو والمبهج بس متعرفشأن لو منجحتش مش هتشوف الجانب دا، كنت عايز أعفيها من كل دا وقعدت 15 سنة أحارب ومنجحتش ومشت كلامها عليا'.

على جانب آخر، كان أحمد سعد اعتذر لجمهوره للمرة الثالثة بسبب اللوك الذي ظهر به مؤخرا.

ونشر أحمد سعد فيديو ظهر فيه وهو يقوم بقص شعره وحلاقة لحيته وقال في الفيديو: 'جمهوري الحبيب الغالي أنا عايزكم تكونوا معايا في اللحظة اللي جايه دي، أنا خلاص توبت عن أي حاجة غريبة مش هعمل أي حاجة غريبة أي حاجة تزعل جمهوري اللي بحبه وبيقعد يقولي لا أنت ليه عامل كده مش هعملها تاني'.

وتابع أحمد سعد: 'طبعا هتقولوا ليه هو كل شوية يعمل حاجات ويرجع يعتذر ويرجع يقول سوري، مش مهم أنتوا هتقولوا إيه المهم إن أنا مش هلاقي الجمهور زعلان مني في أي حاجة تاني في حياتي وهعملها'.