نانسي مجدي تهاجم أحمد الفيشاوي: التاتو حرام مش هنألف دين

هاجمت المذيعة نانسي مجدي الفنان أحمد الفيشاوي بسبب تصريحاته عن 'التاتو'.

وقالت نانسي مجدي خلال برنامج 'القاهرة اليوم': 'أحمد الفيشاوي من أكتر الفنانين اللي عاملين تاتوهات وطول الوقت بيتكلم عن التاتو، وحرية شخصية ومليش الحق إني أنا أقوله أنت بتعمل إيه أو متعملش إيه ومليش الحق إني أقوله لما يطلع في لقاء أنه يقول أه أنا عامل تاتو وأنا بحب التاتو كل دا أنا معنديش مشكلة فيه أنا عندي مشكلة واحدة بس صغيرة أن أحنا نطلع نقول أصل التاتو مش حرام لحد هنا واستوب بنعمل تاتو نقول أن إحنا بنعمل تاتو، بنحب التاتو نقول أن إحنا بنحب التاتو ولكن نقول أن هو مش حرام لا يا جماعة مش صح'.

وتابعت نانسي مجدي: 'ما إحنا مش هنألف دين برضو على مزاجنا، التاتو حرام شرعا والأزهر محرمه، وهرجع أقول في أي أمر ديني بتناوله الفترة دي أن أنا نفسي مش مختصة أني أتكلم في الدين بس أنا بقول اللي عارفاه واللي متأكده منه أن التاتو حرام وفقا للأزهر، ولما الأزهر بيقول أي حاجة بحط في بطني بطيخة صيفي وميبقاش عندي تساؤلات'.

وكان أحمد الفيشاوي تحدث عن 'التاتو' خلال لقائه في برنامج' مع نزار' من تقديم نزار الفارس وقال: 'التاتو جزء من تراثنا خاصة في الصعيد، كنت بتغدى في فندق في الجيزة، وبعدين كان فيه عسكري صعيدي أول يوم خدمة له، وأنا داخل الفندق سألني: 'هو مش الوشم ده حرام؟' قلت له: 'حضرتك جدتك كافرة؟ فقال لا طبعا، فقلت له: طيب مش جدتك عاملة وشم في دقنها، الوشوم بتتعمل في الصعيد منذ آلاف السنين، وموجود من أيام الفراعنة كمان'.