إلهام وجدي عن ياسمين عبد العزيز: شخصية سالكة وذكية جدا

تحدثت الفنانة إلهام وجدي عن تعاونها مع الفنانة ياسمين عبد العزيز في مسلسل 'وننسى اللي كان'.

وقالت إلهام وجدي خلال لقائها في برنامج 'عيش صباحك' عبر إذاعة وقناة 'نجوم FM': ''وننسى اللي كان' مشروع محظوظ اللي موجود فيه لأن ياسمين عبد العزيز نجوميتها ما شاء الله مش أنا اللي هتكلم عليها أي حد بيبقى جنب ياسمين عبد العزيز بينور وبتتفتح له الأبواب'.

وتابعت إلهام وجدي: 'أول مرة أحس بجمهور من الوطن العربي كله عشان حب ياسمين كمان لما طلعنا أصحاب وعشان إحنا أصحاب في الحقيقية وحبينا بعض على المستوى الشخصي ودا بيبان في الكاميرا والفضل ليها، ياسمين شايله المسلسل على عاتقها وهي النجمة لكن مركزة أوي في علاقتنا إحنا كنا بنقعد هما مش عارفين يخلونا نبطل ويقولولنا الكاميرا دايرة'.

واضافت:' هي على المستوى الشخصي لذيذة جدا والحاجة اللي بحبها في ياسمين ومش موجودة في نجوم كتير جدا أن هي حقيقية لو مش بتحبك أو معجبهاش حاجة هتقولك في وشك ودا مريح جدا لأنها مستحيل تبتسم في وشك وهي مش بتحبك هي شخصية حقيقي سالكة هي ذكية جدا لأنها محافظة على القمة لسنين طويلة وبجد بتحب شغلها والناس بتحبها'.

تدور أحداث مسلسل 'وننسى اللي كان' حول نجمة السينما 'جليلة رسلان' وهي امرأة قوية الحضور، محسوبة الخطوات، صنعت نفسها بنفسها ونجحت في الوصول إلى الصف الأول، لكنها تحمل خلف صورتها العامة حساسية إنسانية عميقة، وماضيا لا يزال يطالب بثمنه.

ومسلسل 'وننسى اللي كان' بطولة ياسمين عبد العزيز، كريم فهمي، شيرين رضا، إنجي كيوان، خالد سرحان، محمد لطفي، إدوارد، ومنة فضالي، والعمل من تأليف عمرو محمود ياسين وإخراج محمد حمدي الخبيري.