خاص غادة عبد العال لـ "في الفن": أسلوبي في الكتابة دائمًا حيادي .. و"البحث عن علا" أصبح له جمهور عالمي

لا يزال الموسم الثاني من 'البحث عن علا' للمخرج هادي الباجوري وبطولة هند صبري في المركز الأول على قائمة المسلسلات الأعلى مشاهدة في مصر على منصة نتفليكس، رغم مرور 4 أسابيع على بدء عرضه.

واحتفالًا بالمسلسل الشهير، تواصل FilFan.com بالمؤلفة غادة عبد العال للحديث عن شعبية 'عايزة أتجوز' وكواليس 'البحث عن علا 2' وانضمام ظافر عابدين له وأسلوب كتابتها الحيادي.

وفي السطور التالية نص الحوار مع غادة عبد العال:

ردودر أفعال الجمهور على الموسم الثاني من 'البحث عن علا'

لغاية دلوقتي هو رقم واحد على نتفليكس رغم مرور أسابيع. كلها ردود أفعال لطيفة، الناس في الأول كان في تخوف عندهم من الأجزاء التانية لأي مسلسل، بس الناس كانت مبسوطة بشكل كبير بسبب المواضيع اللي ناقشناها.

سبب التحول في شخصية 'حازم' (طارق الإبياري) ورغبته في السيطرة والتحكم في 'نادية'

حازم معندوش تحول. لو مدينا الخط على استقامته هي دي الطريقة اللي اتربى بيها وهو صغير واحنا حبينا اننا نبص على نتيجة تربية سهير له الطبيعي تطلع شخص عنده رجولة سامة ورغبة في التحكم في ستات العائلة وفكرته عن التربية بالطريقة القديمة، ونحط دة مقابل تطور علا.

يتفق بعض الناس مع تصرف 'حازم' وبينما لا يطيقه البعض ويعتبره مؤذي. ما رأيك في شخصيته؟

حازم مش شرير، هو اتربى كدة، فهو برضه ضحية لطريقة التربية القديمة. سهير مكانتش تعرف أكتر من الطريقة دي ودلوقتي بقى متاح لينا نقرا ونتعلم طرق افضل للتربية ودة اللي علا بتحاول تعمله بس حازم مش مضطر يعمله لأنه لسة بيتعامل بالطريقة القديمة. في ناس شفتهم بيقولوا هو غلط في ايه؟ طريقته صح. وفي ناس بتقول العكس، ففرصة نخلق النقاش دة في المجتمع ونشوف ايه التربية المفروض نستخدمها مع ولادها عشان نتجنب أخطاء الماضي.

لاحظت إن كتابتك للشخصيات حيادية. لا يوجد شر أو خير مطلق. كيف تحققي ذلك؟

أنا عموما هي دي طريقتي في الكتابة من أيام عايزة أتجوز وفي 'امبراطورية مين'، كنا بنتكلم على وقت الثورة وكان كل حد بيتكلم بمنطق انت ممكن تقتنع به لأننا بنعرض وجهات نظر ومش ضروري يبقى أبيض واسود وكويس وشرير حتى في البحث عن علا لما اتكلمنا عن الطلاق مطلعناس 'هشام' بيجرها على محكمة الأسرة، حاولنا نقدم وجهة نظره كشخص بيدور على طريقة أفضل للعيشة، حتى لو جه عليها وظلمها مقلناس ان هو شرير. أسلوبي في الكتابة انني أخلي كل شخصية تتكلم بمنطقها ويبقى في النهاية المحصلة النهائية للنقاش بتبقى للجمهور.

هل حصل 'البحث عن علا' على جمهور عالمي اعتبارًا أن منصة نتفليكس تتيح الفرصة لانتشاره حول العالم؟

لسة امبارح حد من جنوب أفريقيا زميلته قالتله على 'البحث عن علا' ولسة حد مكلمني من أمريكا ومن اسبانيا نفس الكلام. ميزة المنصات انها بتوري ثقافتنا للآخر وتفتح باب للنقاش وفكرة اننا كلنا بندور على نفس الحاجات كاحتياجات انسانية.

هل كان ظافر عابدين أول من فكرتي به أثناء كتابة شخصية 'كريم كراميلا'؟

لا الحقيقة في الأول فكرنا في وجه جديد عشان منحرقش هيكملوا مع بعض ولا لا، بس لما ظهرت فكرة 'ظافر عابدين' وان في كيمياء بينه وبين هند وان الناس بيتبسطوا بيهم مع بعض وفي النهاية العائد كان إيجابي والناس عجبها الثنائي دة.

كيف جاءت فكرة الكهرباء بين الشخصيتين؟

الكهرباء كانت لعبة وهزار تشير لأن العكس بيجذب، هي ست متوترة وهو راجل هادي، بتوحي إن شخصياتهم مختلفة بس في شرارة بينهم.

ما رأيك في تشبيه الجمهور للمسلسل بـEmily In Paris واتهام البعض لكم بالتقليد؟

الحقيقة تناولنا وجود فرنسا بطريقة مختلفة عن Emily In Paris . علا وكريم كانوا برا باريس لكن منتصر هو اللي راح لباريس عشان كان حلمه من الموسم الأول، لكننا ورينا الجزء التاني من باريس مش الجمال والرومانسية. فبالعكس، أنا شايفة إن 'البحث عن علا' وEmily In Paris بينهم تناقض. هما مقدمين كل حاجة جميلة وبراقة واحنا جايبين باريس من تحت الأرض بقى.

هل تعتبريه موسم ثاني من 'البحث عن علا' أم موسم ثالث من 'عايزة أتجوز'؟

بعتبره مسلسل منفصل لأنه عالم مختلف فهو جزء تاني من 'البحث عن علا' بس في النهاية كلهم ولادي.

ما الأفكار والقضايا التي ترغبين مناقشتها بالموسم الثالث؟

لم يتخذ قرار إن في موسم ثالث. في دايما أفكار. بس لسة بدري إننا نقول الكلام دة، بس دايما هيبقى بيناقش قضايا بنعدي بيها في حياتنا. دايما بنحب يبقى في ارتباط بين الشخصية والجمهور.

ما سر اختفائك عن الوسط الفني خارج عالم 'البحث عن علا'؟

أنا شخص انطوائي ومعنديش علاقات كتير فلما تتاح ليا الفرصة أقدم أفكاري لناس بنحاول نشتغل، لكن مش دايما ببقى قادرة إنني أسعى بشكل كبير. مش بحب أشتغل لمجرد الشغل. بحب لما الحاجات بتاعتي تبقى على الشاشة تبقى مؤثرة.

هل يوجد عمل آخر من كتابتك سنشاهده قريبًا؟

بحضر لمسلسل لمرضان 2025 لكن مفيش تفاصيل واضحة بس مش هيكون مع هند صبري.

ما سبب قلة مشاركة النساء في بطولة الأعمال الكوميدية؟

مفيش ناس كتير بكتب كوميديا للستات في مصر. أنا أول ما بدأت كنت بستخدم اسم مستعار والناس افتكرتني راجل لأن في اعتقاد إن الستات مبيعرفوش بيهزروا. أتمنى أكون أنا غيرت الاعتقاد دة. بحاول.

لا بد أن نجاح 'عايزة أتجوز' وتأثيره على المجتمع قد غير هذا الاعتقاد، أليس كذلك؟

طبعا 'عايزة أتجوز' بقى عمل كلاسيكي ومهم للثقافة المصرية.

بعض الجمهور يشتاق لعلا القديمة، ما رأيك في ذلك؟

والله أنا دايما أقولهم كلنا اتغيرنا. أنا شخصيًا اتغيرت من 2010 لدلوقتي، فليه علا مش هتتغير. في النهاية لو واحشاكوا علا، ما هي لسة موجودة، هاتوا 'عايزة اتجوز' واتفرجوا عليه تاني.

هل يوجد شخصية من 'البحث عن علا' تتمني كتابة مسلسل خاص من بطولتها؟

كل الشخصيات تستحق مسلسل خاص، لكن عايزة الفترة الجاية أركز مع الشباب شوية. حابة ألعب مع عالم الـGen z واختلاف الأجيال، اللي ناقشناها شوية في 'البحث عن علا 2' بس مكانش في مجال نتعمق فيها أكتر.معندناش كتير في الوطن العربي من الأعمال الشبابية.

هل شاهدتي 'مدرسة الروابي للبنات'؟

'مدرسة الروابي للبنات' ألهمني انني استكشف عالم المراهقين.

هل كان هناك قلق من مناقشة الدورة الشهرية في الموسم الثاني، اعتبارًا أن هناك بعض المشاهدين يرفضون ذكرها؟

مكانش عندنا قلق، بل كان عندنا حماس. لما جت الفكرة قلنا تعالوا نشوف هنعملها ازاي، مش لإثارة الجدل ولكن لأنه شيء طبيعي البنات بتمر بيه، فليه متبقاش جزء من القضايا اللي الناس بتمر بيه، ودة جزء من الدراما عندنا. دة بيبقى تحدي مثير بالنسبة لينا.