أحمد السلكاوي: الممثل مش لازم يقول مونولجات طويلة علشان يوصّل الشخصية

حل الفنان أحمد السلكاوي ضيفا على برنامج 'منورة بفنها' الذي يقدمه عماد اسماعيل على محطة 'شعبي إف إم'.

ومن أبرز تصريحات أحمد السلكاوي:

تشرفت بحصولي على جائزة أفضل ممثل دور ثاني بالمهرجان القومي للمسرح المصري، خصوصا أن لجنة التحكيم ضمت لفيفا من الأساتذة الكبار بقيادة الفنان والمخرج الكبير خالد جلال

تجربتي في مسرحية 'تياترو' هي الخامسة لي مع المخرج أحمد فؤاد، وفي كيمياء ممتازة بيننا وهو مخرج يستمع جيدا وبيدير المواهب بتمكن كبير، وهو أحد عوامل حصولي على الجائزة

الممثل مش لازم يقول مونولجات طويلة علشان يوصّل الشخصية على المسرح، لكنه يقدر يوصلها بأقل التفاصيل طالما مصدق الشخصية

أول وقوف لي علي المسرح كان على منصة المدرسة في الإذاعة الصباحية وكنت في رابعة ابتدائي، واختاروني علشان كنت شاطر في اللغة العربية

في السنة الثانية من الجامعة لقيت إعلان لمسرح الجامعة عايز ممثلين فقدمت، والفنان سيد عبد الكريم كان بيدرسلي في كلية الزراعة

اللي بيجذبني للدور إنه يكون بيقدم حاجة وإني أكون مصدقه، ودي حاجة اكتسبتها مع الخبرة، ويهمني كمان اسم المخرج ويكون بيعرف يستخدم مفاتيح الممثل اللي قدامه

دوري في مسلسل 'الخروج' كان صعب جدا ولا يمت لي بصلة، ورغم أن الحوار مش كبير لكنه كان مكثف في المشاعر، وكنت مكتئب قبلها ومهمل في مظهري والشكل ده كان مناسب للشخصية

لو هيتم تقديم فيلم 'المشبوه' مرة ثانية هختار اعمل دور بيومي اللي قدمه الفنان الكبير سعيد صالح

بعتز جدا بتجربة مسلسل 'بين السما والأرض' والتجربة دي أثبتت إنه ممكن نعيد إحياء الأعمال السينمائية بالطريقة دي لأنها وسعت مساحات الشخصيات

أتمنى تجسيد شخصية الفنان الأسطوري سمير غانم في عمل عن سيرته الذاتية

الفنان روبن ويليامز من أكتر الفنانين اللي أثروا فيا، وحتي لما قدم دور سيدة في فيلم قدمه ببراعة

لو هرجع بالزمن واختار فنانة أقدم معاها ديو فني هتكون الفنانة العظيمة سناء جميل، وبشوف إنها ممثلة فذة تصدقها في أي نوع شخصية بتقدمه

في جملة بحبها قالها الفنان الكبير كرم مطاوع هي إن ممثل المسرح 'عنده كتير' فلما بيقلل شوية بيفضل مسيطر على الشخصية

المخرج الكبير بيفرض شخصيته على الممثل وبيوجه الممثل كويس وبيتعامل معاه على إنه أهم عنصر عنده، زي المخرج العالمي يوسف شاهين والمخرجة الرائعة كاملة أبو ذكري.