دياب: "شخصية "أسعد" عملتلي مشاكل في حياتي ومع مراتي

تحدث الفنان دياب عن شخصية 'أسعد' وتأثيرها الكبير عليه في حياته الخاصة.

وقال دياب خلال مداخلة هاتفية ببرنامج 'رمضان ويانا' مع إنجي أنور على إذاعة 'نغم إف أم': 'أنا أول مرة في حياتي كاركتر يروح معايا البيت، أنا عملت أشرار كتير وطيبين، ولا كاركتر روح معايا، 'أسعد' روح معايا وعملي مشاكل في حياتي، أكتر عدد خناقات اتخانقتها في البيت من ساعة ما تجوزت وقت ما أنا بعمل المسلسل، مراتي عانت جدا جدا، كنت عصبي وطباعي فيها تغيير ومش بطيق أي كلمة'.

وأكمل دياب: 'في ناس كتير خافوا مني وميعرفوش أن أنا أغلب من الغلب، أنا نفسيا لسه بحاول أتعافى من 'أسعد' لسه نومي مش أحسن حاجة لكن مع الوقت هبقى كويس'.

وعن تحضيراته للمسلسل قال دياب: 'قبل ما السيناريو يجيلي قعدت مع أستاذ تامر محسن وأنا كان نفسي اشتغل معاه، حكالي المسلسل وشخصية 'أسعد' قلت له أنا معاك بعدها بفترة بدأت تطلع الحلقات وكنا بنقعد مع بعض ندرس الشخصية ونشوف هتطلع إزاي ابتديت أغوص جوا تفاصيل الشخصية، على ما دخلنا التصوير بقيت 'أسعد'.

وعرض مسلسل 'قلبي ومفتاحه' في النصف الأول من شهر رمضان 2025 وتكون من 15 حلقة.

يشارك في بطولة مسلسل 'قلبي ومفتاحه' إلى جانب آسر ياسين ومي عز الدين كل من دياب، أشرف عبد الباقي، أحمد خالد صالح، سماء إبراهيم، حازم سمير، عايدة رياض، تقى حسام، وعدد آخر من الفنانين، وهو من تأليف وإخراج تامر محسن، وإنتاج شركة media hub سعدي- جوهر.