بالفيديو - ياسر جلال يردّ على تصريحات ميار الببلاوي ويدافع عن شقيقه

ياسر جلال-6

في لقائه مع الإعلامية فاطمة مصطفى، في برنامجها الراديو بيضحك عبر محطة الراديو 9090، رد الفنان ياسر جلال، على عتاب الفنانة ميار الببلاوي له، بسبب عدم ترشيحها لمسلسل 'الفتوة'، مؤكدًا أنه لا يتدخل في اختيارات مخرج العمل، كما أنه لم يتواصل نهائيًا مع الببلاوي منذ عام 1992، حتى إن طلبت منه الترشح في عمل.

وقال ياسر: 'طبعًا أنا مكنتش عايز أرد على الموضوع ده احترامًا للأستاذة ميار، وهي أخت عزيزة واشتغلت معاها سنة 1992 ومن هذا التاريخ حتى وقتنا هذا أنا لم أر ميار الببلاوي نهائياً، هي كلمتني في التليفون مشكورة بكل احترام، وقالت لي عايزة تمثل وقت تصوير مسلسل 'الفتوة'، وأن المسلسل ده ينفع لها بالحجاب، وطبعًا مش هينفع لأنها هتعمل دور مين نجلاء بدر ولا مي عمر؟، دي أدوار متسكنة والله العظيم أنا راجل ببص في ورقتي، وأي نجم محترم مالوش إنه يتدخل في الكاست ده شغل المخرج، هي ميار علشان غايبة عن الساحة فترة واعتزلت فمتعرفش'.

وأضاف ياسر جلال: أنا رأيي استشاري مع المخرج وعلاقتي بزميلاتي كلها حلوة، وميار نجمة معتزلة بقالها كتير، وعايزاني أفرض وجودها على الساحة، وأنا لما أرشح زميلة أخاف أتفهم غلط، أنا مصلحتي إيه معاها؟ أنا لا أرشح زميلات سيدات وهذا اختصاص المخرج'.

وواصل: 'أنا مبقولش على مدير أعمالي لبيس ودي مش معيبة أنا بقول المساعد بتاعي أو مدير أعمالي، ولما أنا رديت عليها أول مرة ما أنا قادر أرد عليها تاني وأقولها محصلش نصيب، يعني معقولة أنا بالغباء ده؟ ميار ممكن يكون اختلط عليها الأمر وأنا بغير رقمي كتير وهي معهاش رقمي خالص'.

واختتم: 'وأنا أشك ولا أريد الغلط وأقول إن كلمة اللبيس من عندها، ولا يجوز ذلك يا ميار مكنش العشم لأني لا أذيتك في شيء ولا عملتلك حاجة، وده بكلامك أنا أحترمك ومازلت أحترمك، ولم يكن يجب أنها تطلع وتقول هذا الكلام وحجابك له احترامه، إيه الهدف من أنك تطلعي تقولي كده؟، لقمة إيه اللي كنا بنقسمها مع بعض؟ أنا مكنتش بقسم لقمة مع حد، أنا معرفش عنها حاجة من سنة 1992 وكنت بسمع إنها اعتزلت'.

وعن الهجوم الذي يتلقاه شقيقه الفنان رامز جلال، بسبب برامج المقالب التي يقدمها كل عام خلال شهر رمضان، أكد ياسر أن رامز أصبح حقيقة رمضانية، قائلاً: 'رامز جلال جميل، وأنا عايز أقول لكل الناس اللي بتهاجمه هو دلوقتي الفنانين والمشاهير هما اللي بيروحوا له برجليهم، وأنا ليا ناس بتكلمني تقولي معقول رامز مجبناش السنة دي؟ رامز أصبح حقيقة رمضانية موجودة كل سنة، وكل الناس حتى لو ليها تحفظ على اللي بيقدمه بيتفرجوا عليه'.

وأضاف ياسر جلال: 'أنا بشكر رامز على اللي بيقدمه وبحييه على شجاعته وتحمله كم الحروب اللي بياخدها هذا الرجل، أنا بقوله أنت راجل بجد أنك تقدر تتحمل كم الحروب دي وتفضل زي ما أنت نجم النجوم، وأنا أكتر واحد في الكون عارف إنك تستاهل كل خير، ورامز بيعمل خير كتير علشان كده ربنا بيسترها معاه وبيوفقه'.