عمرو مصطفى: محمد منير هو اللي حببني في الموسيقى العربي وولائي كله ليه

حكى الفنان عمرو مصطفى عن دور الفنان محمد منير في حبه للموسيقى العربية، بعدما كان يستمع فقط إلى الأغاني الأجنبية.

وقال عمرو مصطفى خلال لقائه في برنامج 'صاحبة السعادة' مع إسعاد يونس: 'الكينج هو اللي حببني في الموسيقى العربي، زمان كنت بسمع دايما في الراديو 'البرنامج الأوروبي' وفجأة لقيت أغنية بتقول 'يا ليلة عودي تاني' أنا وقتها كنت بسمع أجنبي بس، بعدها نزلت اشتريت كل شرايط محمد منير كنت وقتها في 3 إعدادي ومن هنا ابتديت أعشق الموسيقى العربية لحد ما اتعرفت على خالد تاج الدين وعرفني بعمرو دياب وأغانيه'.

وأكمل عمرو مصطفى: 'محمد منير جالنا جامعة القاهرة وعمل حفلة وشفته وكانت عجباني مزيكته وفرقته كانت جامدة أوي، لما ابتديت أروحله جاردن سيتي عشان أعمله أغنية قالي سمعني، سمعته 'بنات في بلد البنات' وعزفت على الجيار، بعدها جابوا جيتاريست شاطر يعزف فمحمد منير قالهم أنتوا بوظتوا الأغنية عايز الجيتار بتاع عمرو مصطفى قلتله أنا مبعرفش أعزف أنا جيبته عشان قالولي لازم عشان تبقى ملحن تعزف فقالي أنا عايزه بنفس النعكشة بتاعته دي أنا عاجبني الإحساس دا ونزلت أغنية 'بنات' كان وهو اللي معرفني على الشاعرة كوثر مصطفى وطلب مني ألحن الكلام، بعدها عملت أنا وأمير طعيمة 'أبكي''.

وكشف عمرو مصطفى عن تعاون جديد بينه وبين محمد منير قائلا: 'أنا ولائي كله لمحمد منير الهضبة نفسه من معجبي محمد منير هو بالنسبة لينا القدوة والموسيقى المختلفة وإن شاء الله هنعمل مع بعض أغنيتين فيهم أغنية عن قصة حياتي هتبقى درس لأن أنا اتعلمت الدرس'.