باسم سمرة: أنا صريح لكن مش مغرور

قال الفنان باسم سمرة إنه لا يرى نفسه مغرورا بل هو يحب الصراحة.

وقال باسم سمرة خلال لقائه في 'حبر سري': 'مش بتضايق لما حد بيقول إني مغرور، لكن أنا مش مغرور بحب شغلي وبحب الناس يمكن واضح وصريح زيادة'.

وأوضح باسم سمرة أنه لم يعد صريحا كما كان في السابق ولا يتمسك برأه حتى لا يزعج من حوله موضحا: 'أكتر صفة اتغيرت فيا هي الصراحة قلت أوي، كنت زي القطر بقول رأيي وبيبقى عن اقتناع وبتمسك بيه، دلوقتي بدأت أخفف عشان مزعلش الناس مني وميتقالش عليا إني شايف نفسي بس اقسم بالله مش بقول حاجة إلا لما تكون صح، أنا مش بقول الرأي كده وخلاص بيبقى في حاجات بتأكد'.

ورفض باسم سمرة فكرة أن بعض النجوم يتدخلوا في كتابة سيناريو الأعمال واختيار الأبطال قائلا: 'اللي بيختار السيناريو والممثلين دول مش نجوم دول مدعين هو خايف زي ما بيروح لترزي بيفصله حاجة، أنت كممثل وموهوب بتروح ترمي نفسك في البحر وبتعرف تعوم عوم متعرفش أقعد في بيتكم'.

وأكمل باسم سمرة: 'في حاجة اسمها فنان مفيش حاجة اسمها نجم، أنا أحب أبقى فنان، أما النجم اللي عنده لجان وبيشتري حب الناس بفلوس أو تبرعات أو يهدد أنه مش هيشتغل تاني ما تغور في داهية دا مش نجم، النجم اللي الناس تحبه ويخاطب الناس ويشوف مشاكلهم، الفنان اللي يقدر يوصل رسالة'.

يذكر أن باسم سمرة يشارك في موسم رمضان 2026 بمسلسل 'عين سحرية' يتكون من 15 حلقة وبطولة عصام عمر وسما إبراهيم ومحمد علاء وعمر شريف، من تأليف هشام هلال وإخراج سدير مسعود.