رامي إمام يروي قصة أول ضربة قلم من والده عادل إمام: قلدته في فيلم "المحفظة معايا" وسرقت

حكى المخرج رامي إمام عن موقف لا ينساه مع والده وحكاية أول ضربة 'قلم' له.

وقال رامي إمام خلال لقائه في بودكاست 'فضفضت أوي' مع معتز التوني: 'أبويا عمل فيلم 'المحفظة معايا' وكان عن الانفتاح الاقتصادي في السبعينيات وكان طالع في الفيلم دا نشال بينشل المحافظ من الأتوبيسات، أنا شفت الفيلم وتأثرت بيه جدا وأنا في أتوبيس المدرسة حد من الزملاء كان معلق جاكيته في الأتوبيس أخدت المحفظة بتاعته في جيبي، الولد قال مش لاقي محفظتي وأنا والدادة بتستلمني من الأتوبيس طلعت المحفظة، على حظي كان أبويا في البيت، أنا قلت أبويا هيتعامل معايا عادي وكأنه إفيه، ودا كان أول قلم من أبويا'.

وتابع رامي إمام: 'يومها أكلني القلم دا وقالي دا تمثيل، دا كان أول قلم لأنه كان لازم يعمل كده، عادل إمام إثر مش فيا بس أثر في أجيال'.

وأضاف رامي إمام: 'الناس كلها بتفتكر عادل إمام أنه مهرج وقاعد في البيت يقول إفيهات وهو تماما عكس دا هو في البيت الأب المصري الحازم يعني إيه مذاكرش ومتعلمش التعليم هو الأساس، يعني إيه ابقى فاشل وكان يجي يحاسبني وكانت أمي تقوله إني سقطت أو عملت حاجة ويا ويلي يا سواد ليلي يوم ما أكون جايب نمرة أي كلام وألاقي أبويا قاعد مربع على السرير وأنا أقعد قصاده'.

على جانب آخر، كشف المخرج رامي إمام عن سبب اعتذاره عن عدم إخراج مسلسل النجمة يسرا الجديد لرمضان 2026، ويحمل اسم 'حرم السفير'.

وقال رامي إمام: 'كان نفسي جدًا أكمل المسلسل مع يسرا هي حبيبة قلبي وبعشقها وبحبها كان نفسي أكون موجود معاها ولكن ظروفي مسمحتش وكنت مرتبط بأعمال أخرى والأعمال دي ممكن تيجي قبل أو بعد رمضان وأنا مبحبش أدي كلمة لحد غير وأنا واثق منها مليون في % وأتمنى أشتغل معاها'، حسب تصريحاته لبرنامج 'ET بالعربي'.