إسلام فوزي يرد على اتهامات تنمره على "التيك توكر" شريف نصار: معملتلوش حاجة

رد صانع المحتوى إسلام فوزي على اتهامات وتعليقات البعض عن تنمره على التيك توكر الراحل شريف نصار.

وظهر إسلام فوزي في فيديو عبر حسابه على 'تيك توك': 'عندي كلمتين بخصوص شريف نصار الله يرحمه ويغفر له يارب، أنا معرفوش ومعملتش عليه فيديوهات خالص واللي عنده فيديو يجيبهولي، أنا مش عارف ليه من ساعة خبر وفاته امبارح والناس مصرة تلبسني القصة دي أنا معملتش فيديوهات عنه، ومبعوتلي حسبي الله ونعم الوكيل فيك ما أنت تعبت ودخلت المستشفى مش من شوية وربنا بيخلص وأنا معملتش حاجة عن الولد خالص الله يرحمه ومجيتش جنبه تماما على أي اكونت من الأكونتات بتاعتي وفيديوهاته أنا شفتها وسبحان الله ملفتش نظري'.

وتابع إسلام فوزي: 'وللمرة المليون فيديوهاتي مش نقد ولا بضايق حد والقصة كلها هزار وروحوا اسألوا الناس متضايقين ولا لأ، بالعكس في بعض الناس بتبعتلي تطلب مني أعمل فيديو على فيديوهاتها'.

واختتم إسلام فوزي كلامه: 'في بعض الناس مرضى للأسف وأنا تعبت منهم، متشيلونيش شيلة مش بتاعتي أنا مليش دعوة باللي حصل لشريف دا قدرة وأنا شفت الفيديوهات اللي في الآخر هو كان تعبان والموضوع كان مضايقة، سبحان الله الراجل توفى ويشاء القدر أني أعمل عليه فيديو دلوقتي أخلي الناس تدعيله، ويا جماعة الخير بصفة عامة لو هتكتب تعليق أو هتعمل فيديو عن حد يا تقول كلمة لذيذة تهزر يا تسكت لكن الكلام اللي بيجي على الناس أوي بيبقى صعب وأنا تعرضت له'.

معملتش فيديوهات على شريف الله يرحمه بس ربنا اراد انى اعمله فيديو دلوقتى عشان الناس تترحم عليه

وتوفي التيك توكر شريف نصار صباح الجمعة 25 أبريل، وكان اشتهر بفيديوهات يلقي فيها الشعر، لكن خلال الأسابيع الأخيرة تلقى الكثير من التعليقات السلبية والساخرة.

وكان شريف نصار ظهر في فيديو وجه فيه بعض الرسائل: 'الرسالة دي للناس النكرات الذين تعمدوا إحزاني أنا وأهلي عبر منصات التواصل الاجتماعي، مش هقولكم غير جملتين؛ حسبي الله ونعم الوكيل، وأفوض أمري إلى الله، الرسالة الثانية اللي عاوز أوجهها لهؤلاء الأشخاص، إلى كل الذين تورطوا في إحزاني عن عمد، سيسخر الله لكم من يضيق صدوركم ويؤذي قلوبكم ولو بعد حين، واللي أقدر أقوله لنفسي فقط، لا تتعمد إحزان أحد، وقاتل بشرف ولا تمت مقهورا ولا ذليلا، لا تمت إلا محاربا واقفا شامخ الرأس منتصب القامة، عالي المقام'.