أول تعليق من محمد عبد المنصف على أزمته مع لقاء الخميسي: عيلتي فهمت الموضوع

تحدث كابتن محمد عبد المنصف، حارس مرمي نادي الزمالك ومنتخب مصر السابق، لأول مرة عن أزمته بعد إعلان ممثلة انفصالهما بعد زواج 7 سنوات، وهو ما شكل مفاجأة كبرى كونه معروف عنه أنه متزوج فقط من الفنانة لقاء الخميسي.

وقال محمد عبد المنصف خلال لقاء ببرنامج 'اللعيب': طالما أنت ارتضيت أنك شخصية عامة طبيعي الناس تتكلم عليك ويبقى في نقد أو مدح، أنا من ساعة ما بدأت حياتي مش بتكلم عن أسرتي ودايما بتكلم عن شغلي، الموقف دا خاص ملوش علاقة بشغلي ليه علاقة بحاجات أسرية، ممكن الناس تتكلم أه لكن في الآخر الحاجات دي مع العائلة'.

عارف الخطأ كان في إيه وفي الآخر الموضوع عائلي إحنا بنقعد ونصارح بعض كأسرة، مش شايف أن الموضوع كان ممكن يكبر زي ما حصل موضوع عادي'.

وعن أكثر الجمل التي قرأها واستوقفته قال: 'حاجات بتتقال زي إني أنا الخاين والحاجات اللي ملهاش لازمة حسيت أن الناس مش فاهمة حاجة وبتتكلم وخلاص كل حد بيقول حاجة لازم يبص لنفسه الأول وخليك في عيلتك وأسرتك، الناس ساعات بتقول رأيها في حاجات هي متعرفهاش، لكن إحنا عيلة واحدة ومكنتش حابب حد يتكلم في الموضوع دا وعيلتي فهمت الموضوع'.

ووجه له مقدم البرنامج سؤالا إن كان شعر أنه أخطأ وقال محمد عبد المنصف: 'أنا عملت حاجة طبيعية ممكن أي بني آدم يعملها عادي مش مشهور وميبقاش عليه نقد ولا أي حاجة وتفهمت أنا بالنسبة ليا الأهم إزاي أحافظ على الأسرة والعائلة ودا اللي حصل والحمد لله أن الأمور عدت بخير وأتمنى أن الناس تنسى الموضوع لأنه لو في خطأ إحنا كأسرة بنتكلم ونحل، والحمد لله الأمور تمام وبقدر أسرتي جدا والمواقف اللي حصلت ومفيش خلاف، في حاجات بتتفهم وتوصل غلط لكن أهم حاجة إني أنا مش بخاف من البني آدم وبفتح صدري قدام ربنا، لأ أنا بخاف من ربنا والبني آدم بالنسبة ليا شخص زيي ممكن أتكلم معاه وأصارحه عادي، من الناحية الدينية وتربيتنا دي حاجة طبيعية، لكن الجزء الشخصي دا فيه كلام تاني وأحنا بنتكلم فيها كحاجة أسرية'.

وكانت الممثلة إيمان الزيدي أعلنت انفصالها عن كابتن محمد عبد المنصف، حارس مرمي نادي الزمالك ومنتخب مصر السابق.

ونشرت إيمان الزيدي عبر حساباتها في مواقع التواصل الاجتماعي صورتها مع محمد عبد المنصف وكتبت: 'أعلن انفصالي عن زوجي محمد عبد المنصف بعد زواج شرعي دام أكثر من سبع سنوات'.