حكت الفنانة داليا البحيري كواليس خضوعها لعملية تجميل في الوجه، موضحة أنها في البداية كانت ترفض هذا الأمر.

وقالت داليا البحيري خلال لقائها في برنامج 'من ماسبيرو' مع مريم أمين: 'مكانش في بالي خالص إني أعمل العملية دي أول مرة سمعت عن العملية كان من نجلاء بدر أنا مكنتش عارفة أنها عملتها وهي حكتلي عملت إيه، وأنا قلت في نفسي لو أدوني فلوس مش هعمل العملية دي'.

وتابعت داليا البحيري: 'رحت لدكتور البشرة بتاعي وكنت بقوله إني خاسه وتحت عيني مضايقني، أنا قلت هيقولي ناخد شوية بوتوكس، بس هو قالي مش بتفكري تعملي شد الوش، هو مش هيعملي العملية هو كان بينصحني لأنه ملوش مصلحة في إني أعمل العملية، بعدها رحت لدكتور تاني واتكلمت معاه وقعدت شهر عشان أخد القرار وقررت إني مش هعمل العملية'.

وأكملت داليا البحيري: 'بعدها رحت اتكلمت مع الدكتور تاني وأقنعني، كلمت جوزي وحكيتله وقالي أعملي استخارة، عملت استخارة ولقيت نفسي ماشية في إجراءات العملية، أنا طول عمري مش مع أي عملية تجميل تغير شكل البني آدم، أنا قلت للدكتور مش عايزة اتغير عايزة أفضل داليا بس نرجع شوية بالوقت، أنا سعيدة بشكلي والناس عارفاني كده ونجحت كده'.

واختتمت داليا البحيري كلامها: 'دلوقتي بحس أن كان في حاجات مضايقاني في وشي واتحسنت ودا مريحني ومخليني مبسوطة، أنا سعيدة بالعملية جدا وانصح أي ست متضايقة من أي حاجة في شكلها تظبطها بس براحة'.