كشف النجم عمرو سعد عن تفاصيل دور 'الجارحي' في مسلسل 'سيد الناس' الذي قدمه في رمضان 2025.

قال عمرو سعد: 'خلينا البطل مابيشربش سيجارة، ومابيشيش، ودا مقصود، عشان نخليه سادة مابيعملش اي حاجة فيها سِمة غلط، أو حاجة ممكن تبقى مش في مصلحة البني آدم، ومايبقاش عنده عيوب دراميا، بيرفض السرقة وبيرفض الشفل في الحرام وبيرفض الغواية ومتمسك إنه بيحب اخواته برغم إن إخواته مش حابينه'، حسب تصريحاته في برنامج 'يحدث في مصر' الذي يقدمه الإعلامي شريف عامر.

وتابع عمرو سعد: كل دا في إطار بطل احنا عايزينه يوصل للناس، بإنهم يحسوا إنه معلم وقوي، الجمهور بيحب القوي في الأفلام الأمريكي والعربي والهندي، ماتقدرش تعمله مثالي لدرجة أبو العلا البشري، لازم تعمل واحد عنده قوة وعشان تظهر القوة بتاعت البطل لازم يتصدى لأبطال في خناقة.

واستكمل عمرو سعد: كان ممكن نعمل حاجة لذيذة جدا زي فيلم 'العار'، اللي كسر الدنيا وكان هايل وفيه قيمة إنسانية، ودا لذيذ، لكن محمد سامي اختلف عن دا ومنع، ولحد النهاية 'الجارحي' متورط في حاجات سيئة ومش عايز يعملها، واحد إيجابي وبيحل، والمخرج بيقدمه في صورة الشارع بتاعنا الفئة العظمى من الجمهور وتجذبه، الأمريكان لما بييجوا يعمل فيلم بيعملوا 'لحظة إبهار' Wow Moment، لو معملهاش يسقط، يا فرحتي إن أنت عامل حاجة على مزاجك بس مقدرتش توصلها للجمهور.

مسلسل 'سيد الناس' بطولة عمرو سعد، خالد الصاوي، الهام شاهين، منه فضالي، أحمد فهيم، رنا رئيس، نشوى مصطفى، عماد زيادة وآخرين، تأليف وإخراج محمد سامي.