خلال الجزء الثاني من برنامج 'أسرار' الذي تقدمه المذيعة أميرة بدر على قناة 'النهار'، واصل الفنان أحمد الفيشاوي كشف أسراره وتفاصيل علاقة الصداقة التي تربط بين أسرته وبين أسرة النجم عادل إمام، والمصيبة الكبيرة التي فعلها وتسبب فيها بحرق فندق كاملًا.

قال الفيشاوي: 'بموت في عادل إمام وهو بيحبني زي أولاده ولما بيشوفني يهزأني وإحنا حرفيًا عائلة واحدة والناس دي أعمامي إخوات أبويا وأولادهم إخواتي'.

تابع: 'عادل إمام شاف مسلسل (تامر وشوقية)، وقال لي دمك خفيف وأعتقد شاف حاجات تانية، وكلامه عن أدائي في تامر وشوقية كأنها شهادة على صدري'.

أضاف الفيشاوي: 'محمد إمام هو أخويا وعشرة عمر وصديق الطفولة وأيضًا كريم محمود عبد العزيز والراحل هيثم أحمد زكي وعمر مصطفى متولى، كنا بنقضي معظم الوقت مع بعض في مرحلة الطفولة'.

وعن تفاصيل أكبر كارثة تسبب بها في مراهقته، قال أحمد الفيشاوي: 'أكبر مصيبة عملتها حرقت فندق كنت بلعب مع أصدقاء لي والأوتيل كان فيه أرض واسعة زي المنتجعات اللي بتتعمل دلوقتي حدائق وأشجار وكان عندي 17 سنة'.

تابع: 'الفندق كان فيه شعلات داخلها زيت، قلت لأصحابي يلا نلعب تحطيب بشعلات الزيت واللى شعلته تتكسر وتنزل النار على الزرع يبقى هو الخسران فالنتيجة الفندق كله ولع والناس جريت'.

تابع أحمد الفيشاوي: 'أبويا اللى تولى إصلاح الفندق وكان في القاهرة، ووالدي اضطر يصلحه وعمل اتفاق مع ملاك الفندق وقسط قيمة التصليح'.