حكت أسما شريف منير عن أصعب يوم في حياتها وهو قبل وفاة والدتها بيوم واحد.

وقالت أسما شريف منير خلال بودكاست 'يمنى النهاردة': 'موت أمي من أكتر اللحظات اللي فيها ألم اللي بيتعبني أن أنا بيني وبين نفسي دعيت أن هي ترتاح كانت تعبانة أوي كان عندها كانسر ولما تبقي شايفة حد تعبان وتقولي لربنا ريحها'.

وتابعت أسما شريف منير:' اليوم دا بفتكره يوم 3 أبريل وهي توفت يوم 4 أبريل وأنا عيد ميلادي يوم 5 أبريل، كانت الناس بتكلمني الساعة 12 تقولي كل سنة وأنتي طيبة وبعدين يعرفوا ويكلموني تاني ويقولولي البقاء لله'.

وأكملت أسما شريف منير: 'هي كانت أكتر لحظة صعبة يوم ما روحتلها المستشفى قبل وفاتها وكان يوم مؤذي جدا ليا مكنتش قادرة تتكلم شاورتلي قعدت جنبها ونامت في حضني زي القطة كده وكانت خسيت أوي أوي ورجليها كانت تعبت أوي كنت حاسه أنها بتودعني اليوم دا أنا فاكرة إني نزلت بصيت للسما قلت يارب أنا عارفة أنه صعب أوي بس يارب ريحها، نمت لقيت أبويا في أوضتي بيقولي أصحي وفهمت، لفترة كبيرة كنت حاسه بالذنب كأني دعيت عليها'.

وكانت أسما شريف منير أعلنت في بداية سبتمبر الجاري ارتداء الحجاب، ووجهت عبر صفحتها الرسمية في موقع التواصل الاجتماعي إنستجرام رسالة لمتابعيها.

وقامت أسما شريف منير بحذف صورها السابقة بدون الحجاب، ونشرت صورا جديدة لها بالحجاب برفقة زوجها.

وكتبت أسما شريف منير: ' الحمد لله مكنش عندي غير طرحة واحدة وطقم واحد بس يليق بالخطوة دي، بس كنت حاسة من جوايا إن دي الخطوة الصح. الحجاب مش مجرد لبس.. ده قرار من القلب، عهد بيني وبين ربنا، وراحة ما تتوصف'.

وأضافت: 'ادعولي بالثبات و محتاجة اماكن للبس حلو يساعدني علي الخطوة دي.'

يذكر أن أسما شريف منير احتفلت في يونيو الماضي بزواجها.