نشرت الفنانة أصالة على حسابها الخاص بمنصة 'X'، صورة جمعتها بوالدتها وابنتها وحفيدتها، وجهت من خلالها رسالة حب وامتنان وتقدير الى والدتها بمناسبة عيد ميلادها الذي يصادف أيضاً عيد الأم.

قالت أصالة في رسالتها: 'مشوار مشيناه أمّي وأنا، شو كان مشوار صعب عانتني عليه بصبرها بطيبها بعطائها بخوفها عليّ اللي ولا يوم قلّ.. واليوم عيد ميلادها وعيدها وبدي عايدها مرتين وألفين وقلها مليونين كلمة امتنان وشكر ومحبة، كلّ سنة وإنتي سالمة يا حبيبتي وبدي غني لك الموال اللي كان أبي يغنيلك ياه وقوله عنه (عزيزة وبالقلب فايق ربيعا وبمال الأرض عمري ما ببيعا).

أضافت: 'لأنك غرّقتيني محبة ودلع واهتمام، حبيت كلمة أم وشعور الأمّ وصار عندي مع أمي أكتر من أمّ وكلهم بدّي عايدهم، منهم أمّي أمولة الحنونة الغالية الكريمة اللي علّمتني، وكتير مشاعر حلوة زرعت فيي ومعلّق قلبي فيها.

وعددت أصالة في منشورها أمهات عدة في حياتها، قائلة: 'وعندي أمّ بالبحرين بتبهرني كلّ صفاتها، ومن يوم عرفتها شفت فيها الصبر بأعلى درجاته والإيمان بأعمق صفاته، نبيلة عظيمة قدوة، بدي قلها شو بحبها وعايدها.

أضافت: 'وبدّي عايد كل صديقة بحياتي قد ما كان عمرها، صغيرة كانت أو كبيرة حنت عليّ، متل أم لبست منها فستان، تشاركنا بقلم حمرة، أكلت من إيدها لقمة طيبة، غفيت على الكنبة ببيتها متطمنة متل طفلة، كلهم كانوا بالنسبة إلي أمّ، كلّ سنة وكلكم سالمين مرتاحين، الصحة وراحة البال تسكن صدوركم اللي وسعت محبة واهتمام وعطاء بيقدّي الدّني كلها'.

ولفتت الفنانة السورية في منشورها الى أن عيد الأم هو عيد الحب وقالت: 'عيد الأم هو عيد للحب المطلق اللي مو بالضرورة تكون الستّ أمّ وعندا ولاد، المهم إنها قدرت تتمتّع بأجمل صفات الأنوثة وهي الأمومة، وحنّت واهتمت وقدرت بدل عيلة صغيرة تعمل عيلة أكبر وأغلى وحضنت من ولاد هالعالم اللي انحرموا الأم لأي سبب، وما أكتر بهالزمن الأسباب، لهالأمّ العظيمة كلّ الحب والاحترام'.

واختتمت منشورها بالقول: لكلّ ستّ طيبة مُحبّة صبورة، كلّ سنة وإنتوا سالمين يا غاليين يا شركاء الحنان والطيب والأمان'.