وجه الموزع نادر حمدي رسالة للملحنين وصناع الموسيقى في مصر لحل الأزمة والجدل المثار منذ أيام.

وكتب نادر حمدي عبر صفحته على Facebook: 'أصدقائي صناع الموسيقى الموضوع بقى سهل أوي دلوقتي لو المغني اللي بتبعتله ماردش عليك أو مش عاجبه الأغنية وأنت مقتنع بيها هات حد صوته حلو تعرفه وأعمله الأغنية ونزلوها، ماحدش عارف ممكن تبقوا انقذتوا الصناعة وزودا عدد المطربين الكويسين وهتتنسب ليك في النهاية'.

وكان الملحن نادر نور كشف أن سبب ابتعاده عن الساحة الفنية هو أن المطربين لا يستمعون لأغانيه وقال: 'بعتذر لكل الناس اللي بتبعتلي كلمات أغاني، من فضلكم متبعتوش تاني، معنديش مشاريع شغال عليها ولا نجوم بتسمع مني أغاني'.

وبعدها خرج رامي صبري ليثير الجدل وكتب عبر خاصية القصص القصيرة في حسابه على Instagram: ''عدم الرد على ملحنين ومؤلفين أو مبدعين بشكل عام، هو عدم التجديد، وإن مافيش أفكار مختلفة'.

وتابع رامي صبري: 'في ناس مضيقة اني كتبت ستوري إن الملحنين اللي بتبعتلي شغل ما بيعملوش حاجة جديدة ومختلفة ايوة دي حقيقة، يعني أنا أعمل الأغنية وخلاص عشان هي بتتبعتلي'.

وأضاف: 'أنا بعمل الحاجات اللي شايفها من وجهة نظري مختلفة وجديدة ودا مش المفروض يضايق حد، إحنا المشكلة مش في الملحنين والشعراء كلهم كويسين، لكن إحنا مطربين مش كتير، احنا في السوق المصري حوالي من 7 إلى 10 مطربين بالكتير خالص، والملحنين والشعراء كتير جدا'.

ليرد الملحن سامر أبو طالب على تصريحات رامي صبري وقال: 'مبحبش أطلع أتكلم عن أي حاجة وبحب احتفظ برأيي لنفسي وبركز في شغلي وبنجح والحمد لله خطواتي كويسة، بقالنا كام يوم زمايلي الملحنين والشعراء حاسين أن في تجاهل وطلعوا واتكلموا وقالوا كلمتين من قلبهم مضايقنهم وأنا ضميت صوتي لصوتهم، التجاهل هنا مش إننا بنشحت من حد أنه يبص علينا أو يسمعنا لأ فكرة التجاهل هنا إننا لما نبعت لحد عارفنا ومسجل أرقامنا وفي بينا كلام وقعدات مزيكا وفي ناس اشتغلنا معاهم قبل كده ونجحنا مع بعض ففكرة أن أنت متردش أصلا مش حلوة لا في حقك كنجم ولا في حقنا كفنانين وصناع لأن الموضوع دا مؤذي نفسيا تقدر بكل بساطة تقول لا مش عاجبني مش حلو مش اللي أنا عايزة ومحدش هيزعل بالعكس فكرة أنك ترد أصلا دا تقدير منك للشخص اللي بيبعتلك سواء جديد أو ليه اسم'.

وتابع ليوجه كلامه لرامي صبري: 'هخص بالذكر النجم الكبير رامي صبري اللي أنا بحبه جدا على المستوى الشخصي وعلى المستوى الفني، مبدئيا محدش جاب سيرتك أصلا في الموضوع دا لا من قريب ولا من بعيد أه انت من الناس اللي مبتردش وأنت الوحيد اللي طلع اتهم الصناع أنهم معندهومش جديد لا اسمحيلي أقولك إحنا عندنا جديد ومتطورين وهتكلم عن نفسي أنا بشوف نفسي مميز جدا في حتتي وفي ألحاني وبعمل حاجات الحمد لله متطورة وجديدة أنت بس اللي مبتفتحش الشات تشوف سامر أبو طالب باعتلك إيه أو غيره'.

نرشح لك: إيه رأيكم لو حولنا البروفيسور لمسلسل مصري. مين يعمل الأدوار؟