نشر الفنان محمد رمضان، على حسابه الخاص بـ'فيسبوك' بياناً صحافياً أثار به جدلاً حول عدم نشر المواقع الإخبارية خبراً يفيد بتسديده 26 مليون جنيه لمجموعة قنوات MBC، و9 ملايين جنيه رسومًا قضائية، موضحًا أن مجموعة القنوات لم تطالبه بالمبلغ ولكنه فوجئ بالحكم وعمل على تنفيذه.

وكتب رمضان، قائلاً: 'تم تنفيذ حكم القضاء المصري النهاردة بسدادي 26 مليون جنيه الى إم بي سي.. و9 ملايين جنيه رسوم قضائية، السؤال هنا يا سادة ليه مفيش خبر واحد نزل في المواقع؟!.. هل لأن ده خبر إيجابي بيوضح إن محمد رمضان أخد من إم بي سي 13 مليون رجعهم عن طريق القضاء 36 مليون والتزم بالتنفيذ؟!.. ملحوظة إم بي سي لم تطالبني أبداً بالسداد من قبل أنا اتفاجئت بالحكم والحمد لله رقبتنا سدادة'.

ومن ناحية أخرى، سبق أن كشف محمد رمضان، تفاصيل واقعة تعدي نجله بالضرب على طفل آخر في أحد النوادي، حيث نشر عبر حسابه الرسمي بموقع إنستجرام، صورة لمادة من القانون المصري تنص على ضرورة حجب هوية الأطفال، معلقًا: القانون ده من 2018 يا سادة بضرورة حماية الطفل والعيلة بحجب هوية الطفل واسمه وصورته عن الإعلام والصحافة حتى لو كان مُجرد شاهد في قضية، ولكن لأن الطفل ده أبوه محمد رمضان -يبقى حلال- وبالأمر يصدروا بيان صحفي لكل الصحف والمواقع العامة والخاصة والحكومية انشر صورة ابن محمد رمضان واكتب إنه هيتاخد من أمه وأبوه وهيروح دار الرعاية، مع إن القانون بيمنع النشر ولكنهم نشروا.. من حقي كأب اعرف مين خالف القانون واصدر البيان الصحفي اللي مفيش مؤسسة واحدة قدرت ترفض نشره.. ورغم كل شيء لا أشك أبدًا في نزاهة القضاء المصري'.

وأضاف البيان: 'ابني اللي كان واضح في الڤيديو اللي النيابة شافته انه كان قاعد في حاله مع أخته الصغيرة في النادي وراحوله مجموعة أطفال يقولوله أنت أسود زي أبوك وأبوك عنده ڤيلا كبيرة وعربيات علشان فلوسه حرام إنما إحنا عايشين في شقق نيو جيزة علشان أهالينا مش حرامية.. ولما ابني كلمني في التليفون سمعت الكلام ده بنفسي.. وواضح إن ده كلام أهل طفل منهم لأن مستحيل طفل يفكر كده، وده في حد ذاته بيزرع الحقد والغل الطبقي بين الأطفال'.