تحدث الفنان حمادة هلال عن فترة صعبة مر بها جعلته يتعلم كيف يتعامل مع مواقع التواصل الاجتماعي وما يكتب عليها فأصبح أكثر هدوءا.

وحكى حمادة هلال خلال لقائه في برنامج 'كلام نواعم' قائلا: 'الهدوء اللي أنا فيه لأن حصل معايا مشكلة قبل كده في السوشيال ميديا واتعلمت من الدرس دا أيام الثورات العربية عملت أغنية ومكنتش واخد بالي عملت أغنية 'شهداء 25 يناير ماتوا في أحداث يناير' الغنوة نجحت جدا وبعد كده نجحت نجاح تاني خالص نجحت تريقة'.

وتابع حمادة هلال: 'أنا بقيت سنة تريقة السوشيال ميديا كلها وكانت سنة قاسية عليا وكنت أقول أطلع أرد؟ وأمشي في أي حته الناس تشاور وتقول شهداء 25 يناير، كان كلام صعب جدا وعلى السوشيال ميديا لما يحبوا يضايقوا حد لو أنت رديت عليهم وحسستهم أن أنت متضايق والموضوع تعبك يا سلام دي فرحتهم الكبيرة وهتلاقيه مكمل معاك'.

وتابع ليكشف طريقته في الرد على الهجوم: 'أنا بعدها عملت فيلم 'مستر أند مسز عويس' وعملت غنوة 'سبونج بوب' وقصدت إني أكد 'أنا سبونج بوب سفنجة ودا لوني سبونج بوب أصفر كموني' وبعدها عملت صفحة على تويتر اسمها 'بديهيات' وبقيت أقول 'أحلى مايه في كبايه المايه'، بدأت الناس تضحك وتهرج معايا ونسيوا الموضوع واكتشفت أن أنت أحلى حاجة أنك تكبر عقلك'.

يذكر أن حمادة هلال شارك في رمضان 2026 بمسلسل 'المداح' الجزء السادس.

'المداح 6' من بطولة حمادة هلال، هبة مجدي، خالد سرحان، دنيا عبدالعزيز، حمزة العيلي، مفيد عاشور، علاء مرسي، خالد أنور، عفاف رشاد، جمال عبد الناصر، وفاتن سعيد، والعمل من تأليف أمين جمال، وليد أبو المجد، شريف يسري، وإخراج أحمد سمير فرج.