طمأنت الفنانة رحمة أحمد جمهورها عليها بعد تعرضها لوعكة صحية خلال الأيام الماضية.

وكشفت رحمة أحمد تفاصيل حالتها الصحية وقالت في تسجيل صوتي مع ET بالعربي: 'الحمد لله خرجت من المستشفى بالسلامة، نعمة كبيرة من عند ربنا أنا كويسة وإن شاء الله أنزل أكمل تصوير وأكمل الشغل بتاع المشروع اللي كنت بعمله، محتاجة بس أريح كام يوم'.

وتابعت رحمة أحمد: 'مكنش تضخم في الكبد ولا أي حاجة أنا كنت داخلة بنزلة معوية أعراضها شديدة شوية، ودا تداخل مع أعراض أن كان عندي حصوة وكان ظاهر في الأشعة إن في تضخم في الكلى كنت بعاني من آلام شديدة في بطني وجنبي وأنا عندي حساسية مزمنة من حاجات كتير أدوية وأكل وروايح، أدوني مسكن شديد تقريبا تفاعل مع حاجة عملي حساسية طلعت على الجهاز التنفسي وبسببه دخلت العناية المركزة لأن مكنش في نفس، الحمد لله رب العالمين'.

ووجهت رحمة أحمد الشكر لكل النجوم الذين حرصوا على الوقوف بجانبها خلال محنتها قائلة: ' وحابه أشكر أوي دكتور أشرف زكي الراجل دا انا كنت في لحظة من اللحظات بقول أنا مش هرجع تاني بس مش قلقانة عارفة أني هخرج بسلام من المستشفى وهيتم تكريمي من غير دوشة، الراجل دا مش عارفة اشكره إزاي والنقابة وأستاذة نهال عنبر وأستاذة انتصار كل النجوم اللي سألوا ووصوا عليا حاجة كبيرة بالنسبالي، الحمد لله ربنا كان مسخر ليا جنوده على الأرض عشان أقوم وأرجع لمصطفى ابني الحمد لله رب العالمين مش مصدقة أن ممكن اتكلم عادي نعمة صغيرة مكنتش فهماها كان كل همي وكل اللي بطلبه من ربنا وأنا بين إيديه إني أرجع لمصطفى لأنه لسه صغير وأفضل معاه شوية كمان'.

وكانت رحمة أحمد تعرضت لأزمة صحية استدعت نقلها لأحد المستشفيات.

يذكر أن رحمة أحمد عرض لها في شهر رمضان الماضي مسلسل 'الكابتن'، الذي عرض خلال النصف الأول من موسم رمضان الماضي.

مسلسل الكابتن يتكون من 15 حلقة، وهو من بطولة أكرم حسني واَية سماحة وسوسن بدر وأحمد عبد الوهاب ورحمة أحمد فرج وميمي جمال ومحمد رضوان وسامي مغاوري وأحمد الرافعي وعمر شرقي ووئام مجدي، وهو قصة أيمن الشايب وتأليف عمرو الدالي، ومن إخراج معتز التوني، وإنتاج كريم أبو ذكري.

كما شاركت رحمة أحمد في رمضان 2025 بمسلسل '80 باكو'.

ومسلسل '80 باكو' بطولة هدى المفتي، رحمة أحمد، انتصار، دنيا سامي، إنعام سالوسة، محمد لطفي، خالد مختار، تأليف غادة عبد العال، وإخراج كوثر يونس.