لم يتمالك الموسيقار صلاح الشرنوبي دموعه وهو يتحدث عن ابنه الراحل 'محمد' ويحكي عنه علاقته به ومواقف لا ينساها.

وخلال لقائه في برنامج 'كلام الناس' مع ياسمين عز قال صلاح الشرنوبي عن ابنه: 'كان شعلة نشاط وحيوية هو ابني الأكبر وكان سند ليا وكان هو المستشار الأول بالنسبة ليا كل صغيرة وكبيرة كنت برجع له لأن دماغه كانت حلوة أوي وذكي جدا'.

وتابع صلاح الشرنوبي: 'هو مهندس أكتر حد كان حابب الأمتداد بتاعي أنا كهندسة ومزيكا أكتر واحد شارب كل تفاصيلي منذ بدأت وحتى وفاته عارفها ويقعد مع إخواته يحكي لهم كان موسوعة، كنت معتمد عليه اعتماد رئيسي في امتداد الشرنوبي، وعندهم شركة اسمها 'شرنوبيات' واستديو باسمهم كانوا شايلني شيل ربنا يخليلي أولادي رامي وزياد وأحمد وربنا يرحمه حبيبي'.

وكشف صلاح الشرنوبي أن 3 من أولاده ورثوا حب الفن منه قائلا: 'في 3 من أولادي مهتمين بالفن محمد رحمه الله ورامي مهندس صوت وزياد الأصغر، وعندي ابني أحمد بس بعيد عن المهنة دي، هما مهتمين لأنهم عاشوا معايا كل تفاصيل نجاحي في التسعينيات'.

وحكى صلاح الشرنوبي عن موقف لابنه لا ينساه قائلا: 'هو كان طيب جدا، لا أنسى له إزاي كان جدع جدا مرة كنا في رأس السنة كان في مشوار رحناه سوا وإحنا ماشيين لقى عربية مقلوبة، وقف العربية وجري ودخل جوا العربية عشان يخرج اللي موجود وطلع المخرج محمد فاضل ومطمنش غير لما تواصل مع أهله، أنا أفخر بيه أولادي كلهم طالعين عندهم جدعنه ورجوله وشهامه'.

ورحل نجل صلاح الشرنوبي في منتصف يونيو الماضي.