في ظل التطورات والانفجارات التكنلوجيه والمعلوماتيه والتقنيه وتدفقها عبر وسائط التواصل الاجتماعي من واتساب وفيس بوك وتك توك وماسنجر وتلغرام وذكاء اصطناعي (Meta) وغيرها وهنا نجد كل من هب ودب وشب.؟؟ صار من الكتاب .!! ما عليك إلا أن تبحث عن أجمل صورك القيافه وتضعها علي صحفتك ومما زاد الطين بله .؟! ظهر واحد مصري قال هو رئيس اتحاد اعلامي أفريقيا ماعارف ناس أفريقيا ديل أجتمعوا متين وكيف صار دكتور / عوني قنديل رئيساً له و كاد أن يمنح نص الشعب السوداني شهادات إعلامية …يا ناس الأمن والاستخبارات شكلكم عاملين نايمين ( هو تبع الاستخارات المصرية ولا شنوووو وكمان عندو علي ما اظن حزام أسود في الكراتيه وشايفوا مرات بخاطب طلاب الكليات العسكريه السودانية ) . المهم في الأمر انا بلفت نظركم علي خطورة الإعلام الخارجي يا ناس جهاز الامن.؟؟؟ ونرجع لناس البيت زامر الحي الزعلان الداير يطرشك.!!؟؟ اقول للزملاء الصحفيين الحمد لله انا أبوكلام أحمل القيد الصحفي منذ العام ١٩٩٤ بصفة الإحتراف ( سلام علي عزالدين الهندي يا تلميذ أبوروف النموزجية ) وعندي ماجستير في الصحافة منذ العام ٢٠٠٦ ومسؤل أمانة الحريات في شرق أفريقيا قبل كده والآن في أمانة الحريات الصحفية في دورة الرزيقي ومن قبلها مع المرحوم دكتور/ تيتاوي. والمدير التنفيذي ورئيس أتحاد صحفي جنوب كردفان ومن المؤسسين لاتحاد شمال كردفان مع المرحومين/ كرار ابراهيم وبكري السيد أحمد لإ تحاد شمال كردفان و يا أستاذ/ الرشيد يوسف خلي بالك ؟؟ ويا استاذ/ عثمان ميرغني هل تتذكر الزول الجاء مرقك آخر مره من سجن ام درمان ودفع لك غرامة السجن ؟؟ ووداك حتي مقر جريدة التيار ووزعت لهم حلاوة الماكنتوش والبيبسي ولاشنو يا أستاذ/ احمد خوجلي. الصحفي النشط بالتيار والساعد الأيمن لعثمان ميرغني.؟؟؟ (لو أنت نسيت يا ميرغني أنا ما نسيت ) رغم ده كلوا قاعد في مكتبي ( مركز عيون التلال للإنتاج الاعلامي ) مره من المرات جاني يوسف عبدالمنان وقال لي يا مغفل خليك قاعد كده…ههههه بالله انا مغفل يعني يا يوسف الله يسامحك. ؟ وأنا خايف ذاتو الرزيقي يكون المغفل الأكبر ما جايب خبر الملتقي ده .؟؟ ولا مش كده يا محمد الفاتح نائب رئيس اتحاد الصحفيين وصلاح الشيخ الأمين العام شايفكم ظاهرين في الملتقي.!!؟؟؟ وبقية اعضاء الاتحاد مغفلين ما جايبين خبر علي قول يوسف عبدالمنان للمك أبوكلام. ؟؟ عشان كده يا أخي الرجل القامه دكتور/ إبراهيم الصديق علي . أنا متابعك شايفك كاتب للمخابرات العامة وتسألهم وتقول لهم ما هو المعيار الصحفي .؟ وانت تحمل القيد الصحفي منذ العام ١٩٨٨. وذكرت طيلة الاربعة سنوات ومنذ بداية الحرب بقيت خارج دائرة أي دعوة أو تنوير أو مؤتمر صحفي تدعوا له الحكومه أو مؤسساتها. وكل الدعوات بعيدة عنك تمشي منك جاي وجاي شمال ويمين وتتخطاك ..( عندنا جدنا كده صحبو قال ليهو يا راجل يا أخ ما تدي المرأة راحه شوية.؟؟ كل سنة تلدي.. تلدي.. ضحك وقال له يازول .. مرتي دي متسبله سااااكت كن نايمه في العنقريب وجيت نطيتها بغادي هي تلدي ) هههه يا دكتور صديق أنا بكلم البرهان ده إنشاء الله ينطك غادي وانت قاعد في قاعة الملتقي ) . وأنا بدوري ظللت أتابع ردود فعل زامر الحي الذي لا يطرب عن الملتقي الإعلامي الذي نظمته المخابرات العامة وخاطبه سعادة/ البرهان وحضره سعادة/ جابر وفي الصف الاول ظهرت دكتورة /بخيتة امين والبوني وسمية سيد .لو ما عيوني مطششات. ؟؟؟ وهنا بعض من الكتاب الزين كتبوا من زامر الحي ( الشينين ) وقالوا البرهان بحب السمحين ناس الخارج الحلوين الجايين بالطيارة. ؟؟ ويا سعادة البرهان أكيد قرأت النيران الصديقة لاعلامي الداخل…وكان منهم اعلامي وصحافي كردفان عكسها عنهم مراد بله. استنكرو فيها تهميشهم. ؟؟ وكتب معاوية الجاك ( بهدو مع حديث البرهان ) وكتب عوض احمد عمر ( الا الجيش يا سعادة الرئيس ) وكتب مهند الشيخ / ( جابوه بالطيارة وباعوة بالخسارة ) ودكتور/ عبدالله محمد علي بلال( لجنة الحوار وخطورتها علي وحدة الصف الوطني ) وكتب دكتور / عمر كابو ( المواقف لا تقاس بالواسطات ) والأستاذة/ هاجر سليمان سألت ( ماذا يريد مدير المخابرات من الصحفيين ) وأيضا للمره الثانية كتب معاوية الجاك ( الإعلام ومؤتمر الحوار وواحد قال( انتو ذاتكم الدخلكم فيما لا يعنيكم شنووو يااااخ شوفوا شغلكم ما تدخلوا أنفسكم وهيبة الدولة في حته ضيقة ) ؟؟ شكلوا خجل وما قال ليهم تدخلوا الدولة في ( …..؟؟ وزة أو بطة) ههههه سامعك انت ذاتك بتاع شمار ؟؟؟ وكتبت الصحفية ابتسام الشيخ. ( أحرف حرة.. وسألت هل يبدأ التعافي بإنتقاء أهل الإعلام يا سيادة رئيس جهاز المخابرات العامة ) وكتب رحمة عبدالمنعم. ( ملتقي أهل الإعلام شرخ كبير ) وثالث مره كتب مهند الشيخ/ ( نظرية ظل الدليب..قال 170 اعلامي مستوردون من الخارج ) طبعاً مهند الشيخ ده انا بعرفوا زول حسود عشان زول شين قلبوا واجعوا علي ناس برة ( العسل الحلوين ) غايتو الشينين ديل كر يا يمه من قلبهم الوسخان .!؟ كلامي ده مش صح يا ( مكي المغربي ) أما دكتور/ حيدر البدري سأل من نظم ؟ من مول .؟ من دعا.؟ ولماذا دعا هؤلاء .؟ ولم يدع آخرين.؟! وما الذي خرج به الملتقي. ؟؟!! يا سعادة / مفضل دكتور البدري قال داير إجابات بسيطة وعلنية.. خلي بالك من علنية دي بعيدا من ( الغرف المظلمة الظالمة) نقطة سطر جديد. ؟! وطبعا البرهان عندو مستشارين بتاعين زيارات خاصة ( عادل سنادة اخبارك شنووو ) زار احمد عبدالوهاب ( فنجان الصباح ) كان جاري ورحل فات خلاني هناك في الوادي. ؟ وكمان زار البروف العلامة المتواضع/ علي شمو. اعلاميي الداخل قالوا نحن مع الجيش والقوات المسانده منذ البداية وده واجبنا لكن بصراحة شمينا عمك البرهان لانه فرز الكيمان وده شغل وسخان. ؟ ويا سعادة البرهان لو خسرت اعلام الداخل خسرت شعب السودان الساندك وواقف معاك أياك ..وأياك.. الناس حاسيين بيك بديت تتزبزب وشكلك خايف من ناس بره. قحت وأعوانهم . ؟؟!! وكتبت دكتورة/ وداد كمتور. المخابرات خلونا في حالنا لديكم مشاكل البلد إنصرفوا اليها ؟؟ وكتب الهضبي يسن ( فوضي ) عنوان فلم المخرج يوسف شاهين.. ويبدو ان مدير المخابرات سعادة/ مفضل عندما كترت عليهوا النيران الصديقة واتزره ذي زرت ( الكديسه في المطبخ ) طلع وقال ( لم يكن بالإمكان دعوة جميع الصحفيين وقال يتمني يكمل اتحاد الصحفيين السودانيين مع بقية الصحفيين ) الاتحاد بقي ذي ( حمار البغل ) لا حصان الحكومة .؟؟ ولا حمار المعارضة. ؟؟، هو الرزيقي ذاتو شكلوا بره الشبكة. ؟؟؟ ويا البرهان وسعادة مفضل انت لو مفتكر الاتحاد ده بس محمد الفاتح وصلاح الشيخ ( عشان قاعدين في القاهرة ) وبقية المكتب أطرش في الزفه ده كمان موضوع تاني ؟؟؟؟ وكتب مدير مكتب الجزيرة الأسبق/ مسلمي الكباشي..( ملتقي الصحفيين بالخرطوم اين تقع المعركة ) وكتب صاحب الدبوس الحاااار دكتور/ احمد منصور المحامي. انتو يا ناس جهاز الأمن مفارقات عجيبه وغريبه وتحير كمان ؟؟ واخيرا مريم الهندي/ قالت ( هون عليكم فلا زال الطريق طويل اقترح الإسراع بعمل غرفة عمليات إعلامية .هو يا مريومه يا هندية ؟ لو الجهاز والبرهان ديل اصلاً بدعموا الإعلام الوطني بسخاء (جداد الحلة) كان إتحسمت هذا المعركة عبر الوسائط الاعلامية..وللأسف العدو المتمرد المليشي الجنجويدي ( كريم وسخي عل الإعلام ويصرف صرف من لا يخاف الفقر عشان كده حتي الآن عامل إزعاج علي مستوي الداخل والخارج ) البخل عندما يكون علي مستوي الدولة سلااااام علي أمن الوطن .؟! عموماً انتهت مساحة الزاوية ويا سعادة البرهان ده كلام (زامر الحي الذي لا يطربك ولا يرقصك.؟؟ ) شايف أكثر زول طلع مبسوط في اللقاء ده ام وضاح ( سلمت علي رئيس الوزراء كامل ادريس ورئيس السيادة البرهان وكانت ابتساماتها جميلة ونظراتها فريده ؟؟ أما أنا بس من بعيد خالص هناك من الولايات ؟؟ بعاين بعيوني .؟؟ وخشمي وعندي. ؟؟!!

المك/ داؤد أبوكلام داؤد مدير مركز عيون التلال الاعلامي الاثنين ١٤ سبتمبر ٢٠٢٦