وجه الإعلامي عمرو أديب رسالة للنجمة أنغام ردا على شكرها لجمهورها.

كتب عمرو أديب: 'انا بحبك يا انغام جايز معرفتش اعبر عن ده سنين طويله بس انا بحبك فعلا وبحترم كل حاجه عملتيها وقدمتيها، عارفه بقيت بسمع كلمات الاغانى كلمه كلمه وجت لحظه كنت خايف عليكى جدا، اختى وحبيبتى وصاحبتى ، النهارده ندمان انى معبرتش كتير، بس فى رحلتنا سوا لازم تعرفى انى موجود جنبك وبحبك'.

وكانت أنغام نشرت رسالة صوتية وجهت فيها الشكر لجمهورها وأطبائها، جاء بها: 'أنتم دعيتم وربنا استجاب، ودعاءكم كان هو الدواء وهو الإيد اللي بتطبطب وهو الحنية وهو اللي وقفني على رجلي بعد ربنا وبعد الدكاترة، مش عارفة أقول ايه ومش عارفة اتكلم ومش عارفة ما ابكيش من فرحتي والإمتنان للشكر لله ولكم، اللي مالي قلبي دلوقتي وموقفني على رجلي أنكم دعيتم لأنغام من قلوبكم، وكمان دعيتم لأم اتمنت من ربنا إنها تكمل كمان شوية عشان تكمل الحياة مع أولادها وتفرح بهم وترجع تعيش وسطهم تاني، أنا كان كل خوفي إني أسيب ولادي، مكنتش عايزة حاجة خالص من الدنيا غير إني بدعي من ربنا إني ارجع لولادي نفسي أكمل مع ولادي وارجع أعيش وسطهم تاني.

وأضافت أنغام: أنا عديت بمحنة صعبة جدًا عليا وشديدة جدًا بس شكرًا لله أللي حط في قلوبكم كلكم زملائي وأصحابي وأصدقائي وأخواتي ومحبين بيحبوني لله وجمهور بيحب أنغام اللي بتغني جمهور كبير قوي وعظيم قوي ونادر الوجود ونادر ما يكون في قلوب بالجمال دا والصدق دا والحنية دي، وأنا عمري يمكن ما كنت بالضعف دا قبل كدة، بس أنا مش خجلانة أبدا إني أكون ضعيفة قدامكم شوية لإني بقيت حاسة إن أنا حتة منكم وإن أنتم أهلي ومش غلط أبدا ولا عيب إن الإنسان يضعف قدام أهله ويطلب منهم إن هما يستحملوه في وقت ضعفه وانتم استحملتوني أوي ووقفتوني على رجلي بجد بالدعا وبالمحبة اللي وصلتني على سريري في المستشفى وكل ما كنت بفتح عيني وبقرأ كلامكم أو يوصلني بأي شكل من الأشكال وحبكم ودعاءكم وأمنياتكم والكلام الحلو الداعم جدا الحنين جدا اللي كان بيطبطب علي كنت بصر إن أنا أفضل مفتحة عينيا ودا كان أكلي وشربي ودوايا الحقيقي.