كشف المخرج وليد الحلفاوي نجل الفنان الراحل نبيل الحلفاوي عن رأيه في تقديم عمل سيرة ذاتية عن والده.

وقال وليد الحلفاوي خلال لقائه في برنامج 'أسرار النجوم' مع إنجي علي: 'حياة والدي مليانة حاجات بالتجارب اللي مر بيها والفترات اللي مرت على البلد وهو عاشها بس دايما الموضوع دا محير، ساعات تحس أن الجمهور مش عايز من الفنان غير الحاجات اللي كان بيشوفهاله في التليفزيون إنما حياته الشخصية لا، وساعات العكس وحتى التجارب اللي اتعملت محيرة'.

وتابع وليد الحلفاوي: 'عجبني مسلسل 'أم كلثوم' وفي فيلم اتعمل عن عبد الحليم عمله أستاذ شريف عرفة عجب الناس وهنلاقي أعمال أخرى اتعملت عن عبد الحليم مأخدتش نفس الاهتمام، الموضوع بيحير في حياة الفنانين حتى في الحاجات الأجنبي يبقى مطربك المفضل وتدخل فيلم سيرة ذاتية عنه وميعجبكش، غير حياة السياسيين والشخصيات التاريخية الناس بتبقى عايزة تعرف كواليسها أكتر'.

وعن أكثر نصيحة يتذكرها من والده نبيل الحلفاوي قال وليد الحلفاوي: 'مكنش في نصحية معينة هو كان كل كلامه من غير ما الواحد بياخد باله وهو بيتكلم عادي نصايح، هو كان راجل هادي وثقافته كويسة جدا وفي نفس الوقت مش ثقافة بس محتك جامد بالحياة والشارع والناس بيتكلم ببساطة في أي موضوع تلاقي الكلام بيرن في ودن الواحد'.

ورحل الفنان نبيل الحلفاوي عن عالمنا الأحد 15 ديسمبر 2024، عن عمر ناهز 77 عاما.