تحدثت الفنانة الشابة زينب يوسف شعبان عن دخولها مجال التمثيل موضحة أن والدها كان يخاف عليها كثيرا لكنه دعمها أيضا.

وقالت زينب يوسف شعبان خلال لقائها ببرنامج 'كلمة أخيرة': 'بابا الله يرحمه مكنش مع موضوع أن أي حد من أولاده يدخل في سكة الإعلام بس أنا علاقتي بيه كانت غير لما دخلت الجامعة قلت له إني تخصصت إعلام هو قالي أنتي هتبقي مذيعة، وكنت عايزة أخليه مبسوط ويشوف إني قد الموضوع، اتخرجت وبقيت مذيعة فعملت اللي كان رغبته أكتر'.

وتابعت زينب يوسف شعبان عن سبب عدم تحمس والدها لدخول عالم التمثيل: 'هو عارف أن مجال التمثيل صعب وكأب وأنا بنته الصغيرة صعب أنه يتقبل الموضوع وهيخاف عليا غير لو كان أخويا، حتة الحنية اللي كانت مأثرة فيه أنا حبيت اثبت أن عندي القدرة والشغف، هو شافني وأنا مذيعة وكان فخور وقلت له ممكن بقى نجرب التمثيل، للأسف ملحقتش أمثل وهو عايش كانت أمنيتي أطلع في مسلسل معاه، أي حاجة تجمعني معاه'.

وأوضحت زينب يوسف شعبان سبب بدايتها بالتمثيل في الكويت قائلا: 'دخولي التمثيل كان صدفة وبدأت في الكويت كان صدفة كان حلو إني ابدأ هناك عشان ميكونش في أي مقارنة أنا فخورة ومحظوظة أن بابا يوسف شعبان بس من الناحية الفنية مش عايزة اتقارن معاه، فروحت سكة بابا مرحهاش حبيت أثبت نفسي في الخليجي'.

وتطرقت في حديثها لمشاركتها بمسلسل 'لعبة وقلبت بجد' وتقديمها دور خليجية موضحة أن الدور عرض عليها باللهجة الخليجية قائلا: 'كنت عارفة أنهم هيشوفوني ويقولوا إزاي بنت يوسف شعبان ومفيش كلمة مصرية بتخرج منها بس عارفة أن هيشوفوني ويعرفوا إن عندي اللهجة المصرية'.