شاركت النجمة تارا عماد متابعيها عبر صفحتها الرسمية في موقع التواصل الاجتماعي إنستجرام صورا من كواليس مسلسل 'كتالوج'.

وكتبت تارا عماد في التعليق على الصور: 'اقدر اتكلم عن نفسي و عن كل واحد اشتغل في المسلسل دة سواء قدام الكاميرة او وراها ان كلنا اتأثرنا بكتالوج بأشكال ومختلفة و في نفس الوقت اثر فينا بشكل موحد'.

وأضافت: 'الفقدان مع انه محطة هنقف فيها كلنا، بس برضو دائماً بتكون صادمة. اخر صورة هي صورة من قاعدة طرابيزة عملناها عشان نقرأ السكريبت كلنا وانا فاكرة كويس اني رجعت يومها البيت وحكيت لمامتي عن المسلسل و اني متحمسة. وقتها فكرة الفقدان مكنتش بتسمع اوي عندي. او بالاصح انا كنت فاهمة الفكرة بس احاسيسها كانت بعيدة عليا'.

وتابعت: 'ابتديت تصوير كتالوج السنة اللي فاتت وصورت كام مشهد وبعدها والدتي توفت الله يرحمها. كملت تصوير المسلسل بعدها بشوية لأن انا كنت عارفة قد ايه مامتي كانت هتبقى عايزاني ابقى كويسة وقد ايه هي كانت متحمسة للمسلسل. يشاء القدر ان لما ارجع اصور اول يوم يكون مشهد بقول فيه 'إدعولها بالرحمة' (لو شوفتوا المسلسل هتعرفوا المشهد). في لحظتها ولحد دلوقتي مقدرش انكر ولو للحظة إن مامتي كانت معايا و حاسة بيا و سمعاني و بتسندني و مازالت'.

وتدور أحداث مسلسل 'كتالوج' في إطار اجتماعي تراجيدي حول 'يوسف' محمد فراج، الذي يجد نفسه فجأة مسئولا عن طفل وطفلة بعد وفاة زوجته 'أمينة' ريهام عبد الغفور متأثرة بإصابتها بمرض السرطان، ويواجه صعوبات شديدة في التعرف على حياة الطفلين وتفاصيلها وكيفية التعامل معها.

مسلسل 'كتالوج' بطولة: ريهام عبد الغفور، ومحمد فراج، وسماح أنور، وتارا عماد، وخالد كمال، وبيومي فؤاد، والطفل علي البيلي، وريتال عبد العزيز، تأليف أيمن وتار، وإخراج وليد الحلفاوي.

الألبوم إعداد – محمد سليم