حل النجم محمد صبحي ضيفا على برنامج 'لمن يهمه الفن' الذي تقدمه أميرة نور على 'نغم FM'.

ومن أبرز تصريحات محمد صبحي خلال البرنامج:

- مدينة 'سنبل' جزء من مشروع مسلسل 'سنبل رحلة المليون' وبعدين 'سنبل بعد المليون'، وكانت الرسالة موجهة للدولة إن لازم الشباب يتملكوا أرض صحراء يبنوا فيها ويزرعوا ويعملوا مصانع ويعيشوا حياة كاملة.

- سعيد إن ده اللى حصل بعد إذاعة المسلسل بـ 3 سنين، وحلمي اتحقق

- محنة مرضى أنا عارف أسبابها كويس، وهي ضغط الشغل، وقدرت أعدي منها.

- المرض زي ما هو محنة، بيكون فيه منحة، والمنحة إن ربنا قواني أعدى مرحلة الخطر، وأقدم شغل أنا مرتبه

- أنا فى سن يسمح إنى أشتغل كتير، لكن لايسمح إنى أسافر كتير

- الأعمال المستقبلية لمدينة سنبل هى إعادة عرض مسرحية 'عيلة أتعمل لها بلوك' ببعض التغيرات باسم 'عيلة أتعمل لها بلوك تانى'، ومسرحية 'فارس يكشف المستور' كل واحدة منهم ٣ أيام

- بحضر لمسرحية جديدة حاليا بعنوان 'أبو عصايا'، وأبو عصايا اللى هو المايسترو اللى بينظم العمل الفني أو الموسيقي، والاسم كناية عن إنسان مطلوب منه هو وأسرته يعمل مشروع حلم بيه وهو عنده ٨ سنين

- مرة كان ليا دور صغير فى مسرحية مع الفنان فؤاد المهندس، وكون إنى أضحك الصالة مع الفنان فؤاد المهندس ده انتصار كبير جدا، وكان فيه إفيه مش عارف أقوله فجيت فى مرة قولت حاجة تحمل معنيين فالجمهور ضحك جدا، وبعدها خدنى فؤاد المهندس فى الأوضة وقالى 'عيب'، وزعل منى جدا

- مرة اتأخرت عن معادى فى عرض مسرحية 'على بيه مظهر'، وكنا بنعرض الساعة ١٠ والمفروض تواجد الممثل الساعة ٩، ولو اتأخر دقيقة يتخصم له، أما أنا فكنت بببقى موجود من ٧، ولما اتأخرت كتبت ورقة وعلقتها على لوحة الكواليس وكتبت فيها 'خصم ٣ أيام من الفنان محمد صبحى'

- الفنان صلاح عبد الله ممثل جبار، وأنا اكتشفته هو وأحمد آدم بالصدفة، ومرة خصمتله يوم عشان كتب فيا قصيدة شعر بيقولها دايما فى البرامج

- الفنانة سعاد نصر كانت أكتر ممثلة فيه بينا كيميا هي وهناء الشوربجي، وعملت معاهم أعمال صعب إتنين تانيين يعملوها

- الخلاصة اللى خرجت بيها من خلال تجربتى الحياتية والفنية 'أنا أعطيت وطنى الانتماء، ووطني منحنى الاحتواء'

- بشكر جمهورى العريض على كل الحب اللى منحهولي