كشفت مي كمال الدين زوجة النجم أحمد مكي السابقة، عن سبب إفصاحها عن طلاقهما بعد شهور من وقوعه رسميا.

قالت مي كمال الدين: 'أنا بحب أحمد مكي وبحترمه، رغم أن إحنا عاملين بلوك لبعض بعد الطلاق، هو إنسان كويس وجدع، والدبلة اللي في إيدي لسه عليها اسمه، ولسه بحبه وزعلانة على خسارته'، حسب تصريحاتها لبرنامج 'الشفرة' الذي تقدمه علا شوشة عبر قناة 'النهار'.

وتابعت مي كمال الدين: اضطريت أعلن جوازنا وطلاقنا لما لقيت ناس بتشير صوري وتقول إننا هنتجوز، رغم أننا كنا فعلا متجوزين واطلقنا، وده مكنش معلن للجمهور لأن مكي مش بيحب يتكلم عن حياته الخاصة، كل المقربين مننا عارفين إننا كنا متجوزين، لكن ماكناش مجبرين نعلن ده للناس، وأحمد كان دايما رافض ينشر أي حاجة تخص حياته الشخصية.

أما عن سبب إعلانها المفاجئ عن الانفصال، قالت مي كمال الدين: 'السبب اللي خلاني أطلع أقول إني انفصلت عن أحمد مكي، هو إني لاقيت صور وفيديوهات بيتقال فيها إنه بيستعد للزواج مني، وإحنا أصلا كنا متجوزين وانفصلنا، طب إزاي بيستعد للزواج مني وأنا كنت مراته؟ طب الناس اللي كانوا بيشوفونا مع بعض قبل كده هيقولوا عليا إيه؟ عيب الكلام اللي اتقال ده'.

يذكر أن مي كمال الدين خرجت مؤخرا معلنة أنها تزوجت من أحمد مكي منذ 3 سنوات، وتطلقا بعد وفاة والدته في نوفمبر 2024.