رد الإعلامي محمود سعد على سؤال وجهه الجمهور له بعدما كتب تعليقا على أزمة أبناء الفنان محمود عبد العزيز والمذيعة بوسي شلبي، عبر صفحته على Facebook، ولم يتصل بهما تليفونيا.

وقال محمود سعد في فيديو: 'أنا معنديش تليفون لا محمد ولا كريم، ولما بتابع قصة بتابعها زي الجمهور أنا معنديش معلومات خالص اللي عندي قالوه ناس كتير بوسي مع محمود، لما حصلت الحكاية الكلام مش لطيف والتفاصيل دمها تقيل، كان ممكن أجيب تليفوناتهم بس الحقيقة قلت مش عايز أبقى بضغط عليهم أنا بحبهم من وهما صغيرين وهما دلوقتي كبروا وبقوا نجوم وشخصيات كبيرة ويقدروا ياخدوا قراراتهم'.

وتابع محمود سعد: 'أنا محبش أبقى وصي على حد لمجرد إني كنت صاحب أبوهم، وهما لما بيشوفوني في أي حته بيعاملوني معاملة جميلة بحس فيها أنهم عارفين إني كنت صاحب أبوهم، لقيت إني الأسلم إني اكتب كلمتين هما شافوهم شافوهم أو مشافوهمش بس أنا في حاجة بتعملها مش بتريحك أوي لكن بتحل مشكلة قابلتك أنا قابلتني مشكلة أن في كلام وتجريح في محمود عبد العزيز وإحنا متفقين كلنا كمجموعة إننا ندافع عن بعض، قلت اكتب كلمتين أن يا جماعة لموا الحكاية دي ومش عايزين شوشرة، هما يقروها يعملوا بيها أو لأ، لو معملوش بيها مش ملزمين قدامي بحاجة لكن لو اتكلمت في التليفون هبقى أنا ألزمتهم أن اللي أنا بقوله دا يصح أنهم يعملوه وأنا محبش دا'.

وأكمل محمود سعد: 'فوجئت تاني يوم أن محمد بيدور عليا وجاب تليفوني وكلمني وقعدنا نتكلم كتير، شكرته على أنه اهتم وهو شكرني على إني اهتمت وكانت مكالمة كويسة، أنا مش حابب أورطهم معايا ولا حابب إني أدخل في القصة دي لأن هدخل فيها أعمل إيه دا خلاف بين ناس على شيء ما وأنا عرفت جزء منه لكن الباقي معرفتوش، أنا اللي أقدر أقوله لموا الموضوع أو حاولوا تتصافوا مع بعض أو روحوا المحكمة من غير ما تقعدوا تكتبوا في السوشيال ميديا، حتى محمد قالي أنا معملتش حاجة خالص غير لما طلع الكلام من الجهة التانية رحت مطلع البيان أنا وكريم ومتكلمتش خالص'.

وكان ورثة الفنان الراحل محمود عبد عزيز، ابناه كريم ومحمد، فجروا مفاجأة من العيار الثقيل بإبرازهم لحكم محكمة يؤكد أن مقدمة البرامج بوسي شلبي لم تكن زوجته حتى وفاته بل كانت طليقته منذ عام 1998، وبالتحديد بعد شهر ونصف الشهر من زواجهما!

وجاء بيان ورثة محمود عبد العزيز بعد أشهر قليلة، تحديدا في فبراير الماضي، من انتشار شائعة طلاق بوسي شلبي من محمود عبد العزيز دون تأكيدات أسرته، وخرجت بنفسها لتنفيها ناشرة صورة بطاقتها وجواز السفر مكتوبا بهما أنها زوجة الراحل.

وردت بوسي شلبي وقتها في بيان صحفي يؤكد أن الخبر الذي تداولته بعض المواقع الإخبارية وصفحات التواصل الاجتماعي، الخاص بواقعة طلاقها من الفنان الراحل غير صحيح، مؤكدة أن زوجها كان فوق مستوى الشبهات وعاش وتوفي وهي ما زالت على ذمته.