عرضت الفنانة إسعاد يونس في حلقة اليوم من برنامج 'صاحبة السعادة' المذاع عبر قناة dmc رسائل النجوم للنجم الكبير عادل إمام بمناسبة عيد ميلاده.

وقال أحمد حلمي متذكرا لقاءه الأول بالزعيم عادل إمام: 'كل سنة وإنت طيب يا أستاذ عادل، وعيد ميلاد سعيد عليك يا رب، يا رب تكون في أفضل صحة وأحسن حال يا حبيبي'.

وأضاف أحمد حلمي: 'عايز أقول إمتى أول مرة قابلت فيها أستاذ عادل الزعيم، كان في عرض خاص لفيلم ليه خليتني أحبك، خلص الفيلم ونور النور وكلنا وقفنا والناس بتصفق ومبسوطين، وفجأة لقيته قدامي'.

وتابع: 'طبعا سعادتي برؤيته كانت مهولة، جايز تكون تجاوزت سعادتي بإن الفيلم موجود في السينما والناس بتصفق، دي أول مرة أشوف فيها عادل إمام'.

وقالت إلهام شاهين في رسالتها للزعيم: 'كل سنة وإنت طيب يا عدولة يا زعيم يا جميل يا فنان يا كبير يا حبيبنا كلنا. أنا بالذات بحبك بشكل خاص، ودايما أقول إن فضلك علي، وإنت اللي إديتني أول فرصة في حياتي بطولة في عمل كبير جنبك، ومع مؤلف كبير أستاذ وحيد حامد، والمخرج الكبير سمير سيف، أشكرك من كل قلبي لأنك ساعدتني ووقفت جنبي في بداية حياتي، وبعد الفيلم ده أنا بقيت نجمة لها تميز'.

وقال سامي مغاوري: 'أستاذنا الكبير ونجم نجومنا عادل إمام، كل سنة وإنت طيب، بنحبك أوي، ومش هنسى يوم ما مكانش حد في مصر يعرفني، وعملت دور صغير معاك في فيلم حب في الزنزانة، يوم ما ندهتني في المسرح وحييتني قدام الناس كلها وطبطبت علي، وقلت لي يا سامي إنت هتبقى ممثل كويس جدا ومميز، إنت يومها رفعت روحي المعنوية، ربنا يخليك لنا ونكبر بيك، ودايما في وسطنا، العمر كله والصحة'.

وقالت نهى العمروسي: 'أستاذ عادل بيعمل جو فرحة وبهجة، كلنا بنبقى عاملين زي العيلة وبنضحك، بجد أحلى أيام في حياتي في تصوير جزيرة الشيطان وشمس الزناتي، عمري ما هنسى الأيام الحلوة دي، ربنا يخليك لنا يا زعيمنا وحبيبنا وأستاذنا'.