في إطار الحوار السوداني السوداني وبمبادرة من الكيانات السودانية الوطنية (تكوين) بمختلف مشاربها الفكرية والسياسية والثقافية والإجتماعية ومن شتي ولايات وأقاليم السودان وتحالف (تكوين) والذي يضم أكثر من ( 51 ) كياناً وهو علي وزن (جنين ) الذي يتخلق في البطن السودانيه الولادة. ؟؟ حتي يخرج مولوداُ حراً طليقاً يحقق حلم السودان . !! ؟؟سودان الأمن والوحده والسلام والإستقرار عبر الديمقراطية الحره الشفافه النزيهه. وتداعت قيادات التحالف السوداني وإلتقت نهار اليوم الإثنين ١٩ أكتوبر ٢٠٢٦ في وسط الخرطوم حيث شارع البرلمان وسار الركب بقيادة الدكتور/ محمد عبد الله كوكو..رئيس الكيانات السودانية الوطنية( تكوين ) وبرفقته قيادات القطاعات السبعة التي تمثل اقاليم السودان. من أدروب في شرق السودان حيث البحر الأحمر المالح .؟؟ ومن أقليم دارفور حيث شهداء واسري ومفقودي ونازحي الدبه من الفاشر والمالحه ونيالا حيث النيران والدخان وسجن دقلس حيث الظلم والظلمات.؟؟؟ لأبناء الشعب السوداني الأبي.. و من إقليم النيل الأزرق وجبال النوبا حيث كاودة والجراح النازفه ليل نهار.!!! ومن الإقليم الأوسط حيث مدني المحرره وشهداء ود النورة ومشروع الجزيرة الأخضر وبسمة وأمل السودان ضد الجوع والفقر.؟ ومن النيل الأبيض حيث مصانع السكر ناس عسلاية وكنانه ما أحلي طعم النيل الأبيض.؟؟ وهناك من الشمالية جاء الشباب وكلهم حماس وعلو وقمة الحماس كأنهم النخيل أو الذهب الأصفر الغالي في صحراء العتمور ودماء الشباب الشهداء من المعدنيين الممزوجه بغبار الوطن الطاهر ما أكرمكم.؟؟ وتحرك كل المكتب التنفيذي من وسط الخرطوم التي تتطلع قريباً جداً لعرسها الجميل في مستقبل أيامها المقبلات بعودة أهلها المهجرين في بقاء الدنيا والنازحين داخل الوطن المجروح. ؟؟؟ تحرك الركب صوب شارع عبيد ختم تقاطع الشرقي حيث ضاحية الطائف في شرق الخرطوم ووجدنا هناك بقية من الأعضاء في الإنتظار. أمام مقر لجنة تهيئة الحوار.؟؟ ودلفنا عمارة جميلة لها أبواب.؟؟ باب بعد باب وفي المدخل الأرضي وجدنا ناس في وضع الإستعداد للاجتماع قيل لنا أنهم إناس من النيل الأزرق ربما مزارعيين أو نحو ذلك والله أعلم.. رايت في وسطهم باكاش طلحة المزارع المعروف.؟؟ خرج إلينا شخص كأنه الطاؤؤس الأسمر أنيق الملبس بدلة وكرفتة أسود الشعر ولكن العمر لايقول ذلك وتحسست رأسي وشعرت وكأن في رأسي ( ٩١٩ ) شعره بيضاء .!؟ قلت هوووي يا المك. أبوكلام اسكت..اسكت..بلاش كلام فارغ. وأشار الرجل إلينا هكذا في الاتجاه الجنوبي بأن هناك قاعة اخري في الطابق الأرضي. ونظراته مابين الخوف والتعجب والتوجس وكأني به يقول في نفسة من هؤلاء..رجال ونساء وشباب وانصار سنة وصوفيه و إدارة اهليه جلاليب و بناطلين بدل وكرفتات وناس داقه شورطات ونسوان منقبات واخريات لابسات ثياب وخرج معنا الرجل وتقدم يمشي الهوينا حتي دخلنا القاعة الأنقيه الجميلة كل شي فيها جديد الكراسي والترابيز وجنس أنوار نحن (السمر ديل حتي كادت أن تصير ألواننا بيضاء مثل والنجوم القمر في عز الليل ههههه) المهم جي لنا بالماء والقهوة في قوارير من زجاج سوداء كأنها ( الشامات في خدود بنات السودان الباسمات الحلوات ) البت الأول تحمل قهوة بسكر والبت التانية تحمل قهوة بدون سكر (طبعاُ شمرته مع نفسي جوه.. جوه .. وقلت يا المك. داؤد أبوكلام عمامك بتاعين الحوار السوداني السوداني ديل بكون الضغط والسكري ما خلي فيهم فرقه من شرخ الشباب..) وبعد داك نقصت الكراسي كثرة الوفد وجابوا كراسي زيادة وجلسنا واستوينا وأغلق الباب الزجاجي الشفاف بعد أن دخلت واحده من السكرتيرات الجميلات وفي يدها الأوراق والأقلام.؟؟ الزول جلسه في المنصة ولسع شكلوا متوجس من الناس الكتار ديل ( يعضي شلفتوا ثم يفكها تاني يعضي الشلوفه التحت وتاني يفكها ههههه ) وأنا مراغب من هنااااك…؟؟ قلت في نفسي الزول ده مش شلاليفوا ديل كل يوم معاهوا لماذا يعضيها و يعزبها هكذا اليوم.؟؟!! المهم جلس علي شماله في المنصة الدكتور/ محمد عبد الله كوكو..رئيس تكوين وهو زولي احمر حلبي كده ما عارف اسم كوكو ده جاء من وين لكن صبركم الا أحكها معه الأيام الجاية.!؟ باقي عندنا ( نوبا بقوا حلب ونسوا موضوع جبال النوبا ده خالص..خالص ههههه) المهم عرفنا الرجل من لجنة تهيئة الحوار السوداني السوداني. بنفسة وقال اسموا الأستاذ/ إبراهيم أحمد إبراهيم من دارفور وعاش اكثر من ٣٠ سنة خارج السودان هرباُ من بطش المؤتمر الوطني وحكومة الانقاذ حسب قوله وكل أبناءه قد تخرج من أعرق الجامعات في العالم وهو صاحب الطائرة التي سقطت في سماء الحاج يوسف لو تذكرون في تسعينات القرن الماضي.. وقال رغم أن في نفسي مرارات من الإنقاذ الا أنه جاء من أجل الوطن..!!! وشرح لنا مهام ودور لجنة تهيئة الحوار وأنها مبادرة مستقله مهمتها تهيئة الحوار السوداني السوداني ومهمتها أيضاً الوصول باهل السودان للحوار فيما بينهم بكل كياناته وأحزابة ما عدي المؤتمرالوطني كحزب وليس كأفراد وكيان تأسيس لأنه يحمل السلاح ويحارب ضد الدولة وعن ( صمود ) شكلوا لا يمانع إذا جاءوا وقال أن دور الحكومة هو الدعم اللوجستي ليس إلا.؟؟ وهناك ثمانية دول بما فيهم الخماسية قالت ما عندها مانع تدعم لجنة الحوار لو طلب منهم ذلك. ؟؟؟ ومن قبل انا شخصياً سمعته من الدكتور/ محمد جلال هاشم عضو اللجنة ورئيس المسار الاجتماعي قال هم مثلهم مثل ( جماعة الصيوان ) يدقوا الصيوان للشعب السودان وبس.؟! بعد داك الناس في الصيوان ده تعمل ( عرس ولا عزاء ولا اي حاج ده ما دخلهم ) دي مهمة لجنة الحوارالسوداني السوداني الجايه هي تعمل علي تهيئة الحوار وناس الحوار هم عليهم للوصول الي الفتره الانتقاليه وبعدها للوصول للإنتخابات. ؟؟؟ أثناء الكلام ده جاء متأخرين إثنين من أعضاء الحوار ودخلوا القاعة وهم دكتور/ أيمن سيد لابس بدله كاملة زرقاء اللون وشعره كله ابيض عكس زولنا ( أبراهيم صاحب طيارة الحاج يوسف التي سقطت وقعت قبل سنوات) ثم جاء الاستاذ/ يوسف عبدالله آدم يعقوب وهو في ريعان الشباب وداقي شورط بقميص بدون بدله وشعره اسود كثيف شوية كده.؟؟ وعلمنا منهم أن بقية اعضاء اللجنة في جولة خارج الخرطوم بولاية القضارف وقال الفترة الجاية عندهم جولة خارجيه في أفريقيا الي دولة رواندا.. ( كعبة السلام الأفريقي التي يحج إليها كل باحث عن تجربه الحرب والسلام الشمار ده زياده مني) وعلمنا أن السيد/ عثمان ميرغني الناطق الرسمي للحوار موجود داخل المبني لحظة وجودنا ولكنه لم يظهر لنا حتي أمام المنصه الاعلامية في نهاية اللقاء..ولم نعرف سبب غيابة عسي ولعل لعل شغلتهه عنا بعض المشاغل.؟؟؟ المهم الحديث ذو شجون تحدث اعضاء الحوار الثلاثه و بعدهم تحدث الدكتور/ كوكو وعرف بمهام ودور وهيكل( تكوين) وفتحت الفرص للاعضاء وجاءت المداخلات ثره وبناءه حول مستقبل الحوار السوداني السوداني وضرورة الوصول لوطن آمن ومستقر برؤية أبناءه بعيداً من التدخلات الأجنبية ( وإن كان بعض أعضاء لجنة الحوار أنفسهم يحملون الجنسيات الأجنبيه وربما حتي في رئاسة مجلس الوزراء وحكومة الأمل من يحمل الجنسية الأجنبيه غايتوا حكايتك حكاية يا سودان مشاكلك تضحك الغنمايه والضانايه ) المهم سأل وفد الكيانات السودانيه الوطنيه عن معايير المشاركة في هذا الحوار السوداني السوداني وهل هناك بعض الفئات يمنع مشاركتها وما هو الجدول الزمني لنهاية لجنة تهيئة الحوار ومعايير تكوين اللجنة نفسها..وهل بالإمكان علي تحالف( تكوين ) أن يؤجر عمارة بجوارهم ويعلق لافتته ويشتغل شغلوا.؟؟ ما كلها مبادرات مثلها ومثل مبادرة تهئبة الحوار ( صاروخ أرض جو ومسيرات انتحارية سياسيه..!! ولا كلامك شنو يا استاذ/ عثمان ميرغني ) ونعلم أن هناك (31) كيان شبابي جاهز للحوار نتوقف هنا ونواصل و من ملاحظاتي أن هناك سلم حديدي خارجي في العمارة ملولو ..ملولو ماشي حتي الطابق الرابع في السطوح ذكرني ( قصة فرعون وهامان وإله موسي ) هل يا عثمان ميرغني عمامك ديل بقدرو بطلعوا السلم ده ويطلعوا ( علي نتائج لجنة تهيئة الحوار النهائيه ) وبرضوا قمته دخلت ( الحمام ولقيت حنفيه ما فيها رأس فتحتها فجأة الموية دقت في السقف وبلت لي ضهري بس الله ستر القميص كان ملون مافي زول شاف ضهري المبلول .؟؟ ونحن المكوك في جبال النوبا لو الموية بلتك في ظهرك ( المانجل أو المانج شل المك بوراثة التسلسل والضهر مش بن الأخت ) ده معناه الحكم بارد.. يعني لجنة تهيئة الحوار السوداني رغم البل ذي البل لها..؟؟ إلا إنها ربما.. ربما..؟؟ تحقق السلام للسودان ؟ لكن يا بروف/ قاسم بدري اعمل صيونات في الساحة الخضراء وامشي لسعادة البرهان خلي يديك من مخازن الجيش (مش قلنا جيش واحد وشعب واحد ) يديك العدس والبصل والزيت والملح والشمار .؟! عشان تعمل فته للناس يا أخ امس الجوع قتل الناس ساعات طويله بس الا موية وقهوة مره.؟؟ ولا كلامي ده غلط يا أدروب أونور بتاع سلالاب ببورتسودان. الطموح مهم في كل حاجه خاصة في حل جزور الأزمة السودانية السياسية المعقدة.؟

نلتقي في زاوية أخري لو تاني جينا وقابلنا لجنة الحوار بعد عودت بقية الأعضاء من جولة الولايات والجولات الخارجية المرتقبه. ؟!

المك/ داؤد أبوكلام داؤد. رئيس لجنة الطواريء بإمارة الجبال الستة محافظة هبيلا. الاثتين ١٩ أكتوبر ٢٠٢٦